Bekbolat Orynbekov: Jambyl oblysy turǵyndaryn gazdandyrý máselelerin shuǵyl sheshý qajet
ASTANA. KAZINFORM – Jambyl oblysy respýblıkalyq deńgeıde shuǵyl aralasýdy talap etetin birqatar ótkir problemaǵa tap boldy. Olar gazdandyrý jáne azamattardy turǵyn úımen qamtamasyz etýdegi saqaldy qurylystardy aıaqtaýǵa baılanysty bolyp otyr. Senator Bekbolat Orynbekov Premer-Mınıstrdiń atyna osy másele boıynsha depýtattyq saýal joldady.
Depýtat 2019 jyldan 2022 jylǵa deıin óńirdi gazben jabdyqtaýdy jaqsartýǵa baǵyttalǵan iri tórt jobanyń qurylysy bastalǵanyn, alaıda qurylys materıaldarynyń qymbattaýyna baılanysty jobalar qaıta qaralyp, aıaqtalmaǵanyn aıtty.
«Gazǵa qosylmaǵannan keıin, salynǵan qubyrlardyń tozyǵy jetip, paıdalanýǵa jaramsyz bolýy, arty apattyq jaǵdaıǵa ákelip soǵýy múmkin. Óz sheshimin tappaı, jergilikti halyqtyń narazylyǵyn týdyryp otyrǵan, «saqaldy qurylys» retinde atalyp ketken jobalardyń jumystary aıaqtalmaı jartylaı qalyp otyr. Halyqtyń turmys jaǵdaıyn jaqsartý úshin gazben jabdyqtaýdyń mańyzdylyǵyn eskere otyryp, osy jobalardyń aıaqtalýyn jedeldetý úshin sharalar qabyldaýǵa shaqyramyn», - dep atap ótti senator.
Senatordyń pikirinshe, turǵyn úı máselesin shuǵyl sheshý qajet bolyp otyr. Qazirgi ýaqytta turǵyn úı alýǵa kezekte 34 myńnan astam adam tirkelgen, onyń ishinde 1 987 jetim bala, 3 913 kóp balaly otbasy jáne 8 942-si áleýmettik osal topqa jatady. Osylaısha, senator Úkimet bul máselege de nazar aýdarýy kerek ekenin atap ótti.
«Osy qurylystar aıaqtalǵan kezde, Sarysý jáne Shý aýdandaryndaǵy 32 eldi mekendegi 56 myń turǵyn kógildir otynymen qamtamasyz etiledi. Bul rette, 4 jobalardy tolyq aıaqtaýǵa 16,4 mlrd.teńge qarjy bólý kerek. Taraz qalasyndaǵy káriz jelilerin salý qurylysyna 1,5 mlrd. teńge. qarjy bólý mańyzdy. Bul sharalar halyqtyń ómir súrý jaǵdaılaryn edáýir jaqsartýǵa jáne jyldar boıy sheshilmegen máselelerdi sheshýge múmkindik beredi», - dedi depýtat.
