Bekbolat Moldabekov: Jasandy ıntellekt tek kómekshi qural, jaýapkershilik adamǵa júkteledi

ASTANA. KAZINFORM – Búgin Ortalyq kommýnıkatsııalar qyzmetinde «Digital justice jobalaryn júzege asyrý» taqyrybynda baspasóz konferentsııasy ótti. Іs-shara barysynda QR Ádilet vıtse-mınıstri Bekbolat Moldabekov jýrnalısterdiń saýaldaryna jaýap berdi. Jýrnalısterdiń biri jasandy ıntellekt zań shyǵarý protsesine tartylǵan jaǵdaıda, qate týyndasa jaýapkershilik kimge júkteletini jóninde suraq qoıdy.

– Jasandy ıntellekt eń aldymen kómekshi qural retinde paıdalanylady. Sondyqtan JI eshqandaı jaýapkershilikke tartylmaıdy. Ol tek keńes beredi, baǵyt kórsetedi. Al naqty quqyqtyq kómek qajet bolǵan jaǵdaıda azamattar ýákiletti organǵa nemese advokatqa júginýi tıis, – dedi vıtse-mınıstr Bekbolat Moldabekov.

Sondaı-aq jýrnalıster tsıfrlandyrýdyń arqasynda 20 myńǵa jýyq qaryz joıylǵanyn atap ótip, bul burynǵy esepte qate ketkenin bildire me degen saýal qoıdy.

– Joq, bul jerde sóz qaryzdyń joıylýy jaıynda emes. Túsindirip óteıin, qazirgi tańda notarıýstar sottyń keıbir fýnktsııalaryn atqaryp otyr. Mysaly, eger bir azamat ekinshisine qaryz bolsa jáne ony rastaıtyn senimhat nemese ózge de qujattar bar bolsa, buǵan deıin ol azamat sotqa júginýge májbúr edi. Qazir mundaı jaǵdaıda sotqa barýdyń qajeti joq notarıýs barlyq qujatty qarap, qaryzdyń rastalǵanyna kóz jetkizse, jeke sot oryndaýshysyna materıaldy joldaıdy jáne tıisti qaýly shyǵarylady, – dedi vıtse-mınıstr.

Bekbolat Moldabekovtyń aıtýynsha, notarıýstar sot fýnktsııasyn atqara bastaǵannan keıin belgili bir másele týyndaǵan. Buryn qaryz týraly habarlama «Qazposhta» arqyly jiberiletin. Alaıda azamattardyń mekenjaıyn aýystyrýyna baılanysty hattar keıde 10 kún ishinde jetkizilmeı qalatyn.

– Osy problemany sheshý maqsatynda 20 myńǵa jýyq azamattyń shaǵymdary avtomatty júıege engizildi. Endi mundaı habarlamalar eGov mobile, 1414 nómiri arqyly SMS túrinde jáne Kaspi men Halyq bankteriniń qosymshalary arqyly jetkiziledi. Eger sizge qatysty basqa azamat shaǵym túsirse, bul týraly habarlama mindetti túrde keledi, – dep túsindirdi Ádilet vıtse-mınıstri.

Buǵan deıin Qazaqstanda jasandy ıntellekt salasynda jeti ulttyq standart ázirlengenin jazǵanbyz.