Bekbolat Moldabekov: «Robot sot oryndaýshysy» azamattardyń 2,2 mlrd teńgesin únemdeýge kómektesti

ASTANA. KAZINFORM — Ótken jyldyń tamyz aıynan bastap elimizde «Tsıfrlyq sot oryndaýshysy» jobasy iske qosyldy. Atalǵan júıe atqarýshylyq is júrgizýdi adam qatysýynsyz avtomatty túrde bastaıdy jáne júrgizip jatyr. Bul týraly QR Ádilet vıtse-mınıstri Bekbolat Moldabekov Ortalyq kommýnıkatsııalar qyzmetiniń alańynda ótken baspasóz konferentsııasynda aıtty.

Vıtse-mınıstrdiń aıtýynsha, joba nátıjesinde adam faktoryn boldyrmaý, sybaılas jemqorlyq táýekelderin azaıtý jáne boryshty óndirý protsesin aıtarlyqtaı jedeldetý múmkin boldy. 

— Jobanyń halyq úshin negizgi áleýmettik áserleriniń biri — qarjylyq júktemeni azaıtý. Buryn jeke sot oryndaýshylaryn tartqan jaǵdaıda boryshker qaryz somasynyń 25 paıyzyna deıin komıssııa retinde tóleıtin. Endi avtomattandyrýdyń arqasynda bul shyǵyndar alynyp tastaldy. Nátıjesinde azamattar 2,2 mlrd teńgeden astam qarajatty únemdegen, — dedi ol.

Іs-shara barysynda jýrnalıster tsıfrlandyrý jobalaryna mıllıardtaǵan qarjy jumsalyp jatqanyn aıtyp, onyń halyqqa naqty qandaı tıimdilik beretinin — ýaqyt únemdeı me, shyǵyn qysqara ma, ádilettilik arta ma degen saýal qoıdy.

— Men aıtyp ótkendeı, «Robot sot oryndaýshysy» halyqtyń 2,2 mlrd teńgesin únemdedi. Biz robottyń ózine qosymsha qarjy jumsaǵan joqpyz, biraq ol osyndaı únemge qol jetkizdi. Sol sııaqty tsıfrlandyrý tek kómekshi qural retinde emes, naqty ekonomıkalyq tıimdilik ákelýi tıis, — dep jaýap berdi vıtse-mınıstr Bekbolat Moldabekov.

Buǵan deıin jasandy ıntellekt tek kómekshi qural, jaýapkershilik adamǵa júkteletinin jazǵanbyz.