BEK Qazaqstanǵa alys shetelden kombaın ákelýge kvota bekitti

ASTANA. QazAqparat - Biryńǵaı ekonomıkalyq komıssııa alqasynyń sheshimimen Qazaqstanǵa alys shetelden kombaın ákelýge kvota bekitildi. Bul týraly búgin Ortalyq kommýnıkatsııalar qyzmetindegi brıfıngte QR AShM-niń departament dırektorynyń mindetin atqarýshy Baqyt Іlııasov málim etti.

«Ózderińiz biletindeı, BEK sheshimimen 2013 jyly Keden odaǵy aýmaǵyna alys shetelderden kombaın ákelýge ımporttyq kvota engizildi. Qazaqstan úshin ımporttyq kvota 300 birlik kóleminde bekitildi. Olar Qazaqstan aýmaǵyna salyqsyz engiziledi. Kombaındar negizinen «John Deere», «New Holland» jáne «Claas» syndy álemdik kóshbasshy tehnıkalar», - dedi ol. Onyń atap ótýinshe, ótken 3 jyldyń ishinde elimiz ortasha eseppen 250-300 atalǵan markadaǵy kombaındy ımporttaǵan. «Munan artyq ákelýge bizdiń quqymyz joq», - dedi B.Іlııasov. Esterińizge sala keteıik, BEK sheshimimen Qazaqstanǵa 2014 jyly 300, 2015 jyly - 309, al 2016 jyly - 204 kombaın ákelýge ımporttyq kvota belgilengen bolatyn.