«Bek Eırdiń» bılet aqshasyn qaıtarmaýyna qatysty aryz boıynsha sot bastaldy

ALMATY. QazAqparat – Búgin Almaty qalasynyń Túrksib aýdandyq sotynda Tutynýshylardyń quqyqtaryn qorǵaý komıtetiniń «Bek Eır» AQ-nyń áýe kompanııasynyń jolaýshylaryna kúshi joıylǵan reısterdiń aqshalaı qarajatty qaıtarý jónindegi talap aryzy boıynsha beınekonferents baılanys rejıminde birinshi sot otyrysy ótkizildi, dep habarlaıdy QazAqparat.

QR Saýda jáne ıntegratsııa mınıstrligi baspasóz qyzmetiniń málimetinshe, 22 sáýirdegi jaǵdaı boıynsha komıtet 560 qazaqstandyq - «Bek Eır» AQ-nyń klıentteriniń múddesin qorǵaıdy.

«Olar 37 mln teńgeden astam somaǵa 1 070 bılet satyp alǵan. Tutynýshylardyń ótinishteri komıtetke kún saıyn túsedi. Sondyqtan komıtet talap aryzdy sot sheshimi shyǵarylǵanǵa deıin kelip túsken aryzdarmen tolyqtyratyn bolady», delingen habarlamada.

Sot otyrysy barysynda «Bek Eır» AQ-nyń ókili áýekompanııa klıentterine aqsha qaıtarý protsesin bastaǵanyn habarlady.

Onyń aıtýynsha, áýekompanııa 300 mln teńgege jýyq qarjy qaıtarǵan. Qarajatty qaıtarý úshin tutynýshy avıakompanııaǵa baryp, bılettiń alynǵanyn rastaıtyn qujattardy usynýy qajet.

Kelesi sot otyrysy 2020 jyldyń 13 mamyryna taǵaıyndaldy.