«Bek Eır» jumyssyz qalǵan qyzmetkerlerine ótemaqy tóleýi tıis – mınıstrlik

NUR-SULTAN. QazAqparat - Qazaqstannyń avıatsııalyq ákimshiligi «Bek Eır» avıakompanııasynyń paıdalanýshy jáne áýe kemeleriniń ushýǵa jaramdylyǵy týraly sertıfıkatyn qaıtaryp alǵan bolatyn. Osyǵan baılanysty QR Indýstrııa jáne ınfraqurylymdyq damý mınıstrligi atalǵan áýe kompanııanyń buryn satyp alynǵan áýe bıletteriniń aqshasyn jolaýshylarǵa qaıtarýǵa qatysty birqatar suraq týyndaǵanyn aıtty, dep habarlaıdy QazAqparat tilshisi.

Eńbek zańnamasyna sáıkes «Bek Eır» AQ qyzmetkerlerin eńbek jaǵdaılarynyń ózgergeni týraly jazbasha habardar etýge, olardyń eńbek qyzmetin rastaıtyn qujattardy berýge, sondaı-aq qyzmetkerlerine ótemaqy tólemderin júzege asyrýǵa tıis.

«Investıtsııalar jáne damý mınıstriniń 2015 jylǵy 30 sáýirdegi № 540 buıryǵymen bekitilgen Jolaýshylardy, bagajdy jáne júkterdi áýe kóligimen tasymaldaý qaǵıdalaryna sáıkes áýe kompanııasy buryn satyp alynǵan bıletter úshin jolaýshylarǵa aqshany qaıtarýǵa mindetti. Qazaqstannyń avıatsııalyq ákimshiligi jáne Azamattyq avıatsııa komıteti «Bek Eır» AQ-nyń jumystan shyǵarylǵan qyzmetkerlerine balama jumys tabýǵa kómektesedi. Aldaǵy kúnderi arnaıy saıt ashylady. Onda áýe kompanııanyń qyzmetkerleri jumys izdeý úshin tirkele alady», - dep habarlady mınıstrlikten.

Eske sala keteıik, 2019 jyldyń 27 jeltoqsanynda Almaty-Nur-Sultan baǵytyndaǵy ushaq apatqa ushyrady. Bortynda 93 jolaýshy jáne 5 ekıpaj múshesi boldy. Áýe kemesiniń komandıri 57 jastaǵy Marat Muratbaev oqıǵa ornynda ajal qushty.

Ushaq jerge qulaǵan soń syrǵanap baryp áýejaı aýmaǵyna jaqyn ornalasqan eki qabatty úıge soǵyldy. Saldarynan 12 adam qaza tapty. Osydan keıin Bek Air áýe kompanııasyna tıesili toǵyz Fokker-100 ushaǵynyń qyzmeti toqtatyldy.

Arada bir aı ótkennen keıin apatqa ushyraǵan Bek Air ushaǵynyń ekinshi ushqyshy qaza boldy.

Keıin ushaq apatynyń sońǵy sátteriniń hronologııasy jarııalandy.