BEK elderindegi roýmıng taıaý jyldary nólge túsirilýi múmkin - EEK mınıstri N.Aldabergenov
ASTANA. 27 jeltoqsan. QazAqparat - Biryńǵaı ekonomıkalyq keńistik elderiniń mobıldik opreatorlary jelilerindegi roýmıngtý taıaý birneshe jylda nólge deıin túsirilýi múmkin. Bul jaıly Primeminister.kz saıtyna bergen eksklıýzıvti suhbatynda Eýrazııalyq ekonomıkalyq komıssııanyń básekelestik jáne monopolııaǵa qarsy retteý boıynsha alqa múshesi (mınıstr) Nurlan Aldabergenov habarlady.
«Qazir bizdiń shekaralarymyz ashyq jáne ár adam KO elderi aýmaǵynda júrgende qazaqstandyq tarıfterden 20 esege asyp túsetin roýmıngte qońyraýlardy tarıfteý problemasyna tap bolady. Roýmıngti nóldeý birqatar zańnamalarǵa túzetýler engizýdi talap etkendikten, oǵan ýaqyt qajet, bul úsh-tórt jyl kóleminde iske asyrylady dep oılaımyn», - dedi N.Aldabergenov.
Ol Eýropa elderinde 2015 jylǵa qaraı roýmıngti tolyǵymen nóldeý máselesi sheshilip jatqanyn qosyp aıtty.
Mınıstrdiń aıtýynsha, osyndaı tosqaýyldar qoıǵan uıaly baılanys operatorlary klıentterinen aırylady, bul óz aldyna aqshalaı túsim kólemderiniń azaıýyna alyp keledi.
«Mysalǵa, elimizden Reseıge barǵanda biz reseılik nómirlerge jáne uıaly baılanys operatorlaryna qosylamyz, al Qazaqstanda qaıtadan jergilikti uıaly baılanysqa aýysamyz. Men de osyndaı máselege tap boldym, úsh-tórt ret sóıleskende biraz aqsham ketti», - dep mysal keltirdi N.Aldabergenov.
Sonymen qatar, ol qazaqstandyq operatorlar tarapynan bul máselege qatysty aıqyn qarsylyq joqtyǵyn atap ótti.
«Biraq, olar birqatar zańnamalardy biregeılendirý, teń sharttar týraly máseleni qozǵaıdy. Bul álemdik tájirıbe, biz soǵan kele jatyrmyz», - dep qortyndylady N.Aldabergenov.
