BEK boıynsha úsh memleket arasynda 2012 jylǵa deıin 20 kelisimshart qabyldanady - J. Aıtjanova
qpannyń 22-si. QazAqparat /Qanat Mámetqazyuly/ - Biryńǵaı ekonomıkalyq keńistik boıynsha Qazaqstan, Reseı, Belarýs memleketteri arasynda 2012 jylǵa deıin 20 kelisimshart qabyldanady.
Búgin QR Parlamenti Májilisinde «Keden odaǵyndaǵy salyqty jáne kedendik ákimshilendirý týraly» taqyrypta ótken Úkimet saǵatynda QR Indýstrııa jáne saýda vıtse-mınıstri Janar Aıtjanova osylaı málim etti, dep habarlaıdy QazAqparat.
«Keden odaǵyna qatysýshy úsh Memlekettiń basshylary ótken jyly Biryńǵaı ekonomıkalyq keńistiktiń normatıvtik quqyqtyq bazasyn 2012 jyldyń 1-shi qańtaryna deıin qalyptastyrý týraly sheshim qabyldaǵan bolatyn. Osy sheshimdi júzege asyrý úshin 20 kelissózdi eki kezeńmen ázirleý josparlanǵan. Birinshi kezeń barysynda 2011 jylǵy shildeniń 1-ine deıin 14 kelisimdi ratıfıkatsııalaý kútiledi. Ekinshi kezeń boıynsha 2012 jylǵy qańtardyń 1-ine deıin qalǵan 6 kelisimdi ratıfıkatsııalaý josparlanǵan», dedi J. Aıtjanova.
Onyń aıtýynsha, atalǵan kelisimder birneshe baǵytty qamtıdy. Máselen, bunda biryńǵaı ekonomıkalyq saıasatty, atap aıtqanda biryńǵaı makroekonomıkalyq saıasat, biryńǵaı básekelestikti qorǵaý saıasatyn jáne tabıǵı monopolııalardy retteý júıesin biryńǵaı deńgeıge keltirý sharalaryn kózdeıdi. «Bunymen qosa kapıtaldyń emin-erkin qozǵalysqa túsýi úshin biryńǵaı ınvestıtsııalyq jáne valıýtany almastyrý júıesin qurý qarastyrylyp otyr. Sondaı-aq, bul kelisimder úsh memlekettiń naryǵy arasynda qyzmet kórsetetin kásiporyndardyń emin-erkin jumys isteýi úshin jaǵdaı qalyptastyrady. Sonymen birge, bundaı kelisimderde jumys kúshiniń erkin qozǵalysyn qamtıtyn sharalar da kózdeledi», dedi J. Aıtjanova.
