BEK aıasyndaǵy memleketústilik qurylym maqsatqa emes, quralǵa jaqyn - saıasattanýshy A.Koýen
ASTANA. 26 sáýir. QazAqparat - Biryńǵaı ekonomıkalyq keńistik aıasyndaǵy memleketústilik qurylym - bul maqsatqa emes, quralǵa jaqyn.
Búgin Astanada ótip jatqan Eýrazııa medıa forýmy barysynda «Herıtedj Faýndeıshn» ókili, saıasattanýshy Arıel Koýen osyndaı pikir bildirdi.
Bul rette moderator «Russia Today» departamentiniń jetekshisi Oksana Derevıanko: «Eýrazııalyq ekonomıkalyq odaq qurý, ony budan ári damytý barysynda úsh eldiń de ulttyq múddeleri saqtala ma?», - dep suraǵan edi.
«Men burynǵy Keńes Odaǵy aýmaǵynda osy taqilettes uıym qurý týraly nıetti estigenimde eki-úsh qanatty sóz esime túsedi. Birinshisi marqum Chernomyrdınniń «Ne jasaýǵa tyryssańyz da, báribir SOKP bolyp shyǵady» degen pikiri. Ekinshisi Gegelge tıesili: «Aldymen tezıs, sosyn antıtezıs, odan keıin sıntez». Chernomyrdınniń sózimen salystyrǵanda, bul sátti shyqqan nusqa. Máselen, tezıs - bul Reseı ımperııasy, antıtezıs - Keńes Odaǵynyń kúıreýi men toqyraýy, al sıntez osynyń barlyǵyn eskeretin jaqsy nárse. Úshinshi másele Karl Marks aıtpaqshy: «Tarıh birinshi joly tragedııa, ekinshi ret fars (ersileý ázil) bolyp qaıtalanady». Endeshe, men sońǵysyna toqtalǵym keledi, degenmen fars bolmas úshin búldirmeý kerek», - dedi A. Koýen.
Bul rette sarapshy memleketústilik qurylym qurylatynyna toqtala kele, óńirdegi erekshelikterdi (máselen, Qytaı, Ortalyq Azııadaǵy radıkaldy dinı aǵymdar sekildi - avt.) eskergen saıyn soǵan qarsy uıymnyń qajettigi aıqyndala túsetinin, onyń ekonomıkalyq qurylym bola alatynyn da alǵa tartady. «Bunyń barlyǵyn UQShU, AÓІSShK aıasynda da, Reseıdiń úlken geosaıasaty aıasynda da qarastyrýǵa bolady. Bylaısha, aıtqanda bul maqsat emes, tek qural ǵana», - dedi A. Koýen.
