BEK aýmaǵynda eńbek qyzmetin júzege asyrýǵa ruqsat alý talap etilmeıtin bolady
ANA. 2 maýsym. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Kóship-qonýshy eńbekshiler men olardyń músheleriniń quqyqtyq mártebesi týraly kelisimdi ratıfıkatsııalaý týraly» QR Zańyn qabyldady.
Qujattyń maqsaty kóship-qonýshy eńbekshiler men olardyń otbasy músheleriniń quqyqtyq mártebesin aıqyndaıtyn, olardyń eńbek qyzmetin júzege asyrý tártibin jáne olardy áleýmettik qorǵaýǵa baılanysty máselelerdi retteý bolyp tabylady. Kelisim Keden odaǵy aıasyndaǵy úsh eldiń qyzmetker azamattarynyń erkin júrip-turýy úshin jaǵdaılardy qamtamasyz etetindikten, Biryńǵaı ekonomıkalyq keńistikti qurý maqsattaryna saı keledi. «Búgingi kúni ár memleket ózderiniń ishki eńbek naryǵyn qorǵaý maqsatynda jumys isteýge arnalǵan ruqsat alý tártipterin, kvota belgileý sharalaryn qoldanady. Biraq, óz kezeginde bul sharalar jumysshylardy jiberý erejeleri úshin eńbek qyzmetin júzege asyrý barysyndaǵy ákimshilik kedergiler bolyp tabylady. Sondyqtan, kelisim boıynsha endigi rette bizdiń elge sheteldik jumys kúshin tartýǵa ruqsat alý talaptary qajet etilmeıtin bolady. Osy úsh el arasyndaǵy atalǵan shekteýlerdi alyp tastaýdy Qazaqstan Úkimeti birqatar jaǵdaılardy eskere otyryp qabyldady», - dedi zań jobasyn túsindirgen Eńbek jáne halyqty áleýmettik qorǵaý mınıstri Gúlshara Ábdiqalyqova. Mınıstrdiń aıtýynsha, Biryńǵaı ekonomıkalyq keńistik aıasynda jumys isteýge ruqsat alýdy boldyrmaý adam kapıtalynyń erkin qozǵalysy jónindegi halyqaralyq normalardyń talaptaryna sáıkes keledi.
Parlament qabyldaǵan zań Elbasynyń qol qoıýyna jiberiledi.
