BEK aýktsıondaryna qalaı qatysýǵa bolady
ASTANA. QazAqparat - Kelesi aıda Qazaqstanda balamaly energııa kózderi boıynsha alǵashqy aýktsıon ótedi. Osy jumysqa "Korem" atty arnaıy kompanııa jaýapty, dep xabarlaıdy QazAqparat tilshisi.
"Korem" AQ tóraǵasynyń orynbasary Erjan Mádıevtiń aıtýynsha, aýktsıondardy ótkizýdiń ózindik tártibi bar. Aldymen QR Energetıka mınıstrligi óziniń saıtynda arnaıy kesteni jarııalaıdy. Onda satyp alynatyn energııanyń kólemi, kún, jel men sý elektr stansylary salynatyn aımaqtar, sondaı-aq, shekti tarıfter kórsetiledi. Osy kásipke qyzyǵýshylyq bildirgen ınvestorlar qajetti qujattardy jınap, aýktsıonǵa qatysýǵa ótinim bere alady. Dál sol aýktsıonda balamaly energııany eń arzan tarıfpen satamyn degen qatysýshy jeńimpaz atanady. Sóıtip, kún, jel, ıa bolmasa, sý elektr stansasyn salyp, sol jerde óndirgen energııany memleketke sata alady.
"Aýktsıon jabyq úlgide ótedi. Ótinish bergender bir-birin kóre almaıdy. Biz olardyń ishinen eń arzan tarıf belgilegen kompanııany tańdap, onyń usynǵan jobasyn satyp alamyz. Aǵymdaǵy jyly 23 mamyrda biz alǵashqy aýktsıondy uıymdastyrýdy josparlap otyrmyz. Sheteldik ınvestorlar tarapynan qyzyǵýshylyq bar. Aldaǵy ýaqytta aýktsıondar jylyna eki ret ótkiziledi. Kóktemde shaǵyn jobalarǵa aýktsıondar uıymdastyrylsa, kúzde iri jobalarǵa aýktsıondar ótkiziledi degen jospar bar. Іri jobalarǵa sheteldik ınvestorlar kelýi tıis", - dedi E.Mádıev QazAqparat tilshisine bergen suxbatynda.
Onyń aıtýynsha, buǵan deıin balamaly energııa kózderi shekti tarıfter boıynsha satyp alynsa, endigi kezekte tek eń tómen baǵa bergen kompanııa ǵana ózi óndirgen energııany sata alady.
"Biz osy salada álemdik tájirıbeni de zerdelep shyqtyq. Osy oraıda Saýd Arabııasy, Meksıka sııaqty elderde ótken aýktsıondardy erekshe atap ótken jón. Máselen, Meksıkada bolǵan aýktsıonda balamaly energııanyń 1 KVt/saǵaty 1,7 tsentke deıin tústi. Bul - álem boıynsha eń tómengi baǵa. Meksıka ol jaǵynan rekord jasady. Týra sondaı tájirıbe bizde de bolady degen úmit bar", - dep atap kórsetti E.Mádıev.
Mamannyń sózine qaraǵanda, búginde balamaly energııa kózderiniń úlesi kóp emes. Sondyqtan aýktsıondar kezinde energııa eń tómengi baǵamen satyp alynsa da, xalyq úshin elektrenergııa tarıfteri kóp ózgermeıdi. Esesine, qorshaǵan ortaǵa shyǵarylatyn zııandy qaldyqtar azaıady. Sebebi balamaly energııanyń úlesi artqan saıyn jaǵylatyn kómirdiń kólemi azaıady.
Aıta keteıik, búgin Astanada balamaly energııa kózderiniń aýktsıondaryna arnalǵan jıyn bastaldy. Sol jerde QR Energetıka mınıstri Qanat Bozymbaev BEK jobalaryna jer telimin berý jaǵynan jeńildik jasalatynyn jetkizdi.
Foto: newscenter.lbl.gov
