«Bek Air» ushaǵynyń apaty: Prokýror aıyptalýshylardy bas bostandyǵynan aıyrýdy surady
TALDYQORǴAN. QazAqparat- Almaty oblysynyń Talǵar aýdandyq sotynda áýejaı mańynan zańsyz jer bergen eks-sheneýnikterdiń isi qaralyp jatyr.
Búgin prokýror olardy 4 jyldan 6 jylǵa bas bostandyǵynan aıyrý jazasyn surady, - dep habarlaıdy QazAqparat tilshisi.
Alty adam sottalyp jatyr. Onyń beseýi eks-sheneýnikter. Olar Rýstam Turysbekov, Jaras Mashımbaev, Berik Abdýllaev, Medeý Qalybekov, Qaırat Altynbekuly jáne rıeltor Nuraıym Aldanısh. Rıeltor qamaýda otyr. Al burynǵy sheneýnikter úı qamaqta. Búgin atalǵan is boıynsha jaryssóz boldy. Prokýror sottalýshylarǵa kelesideı jaza surady. Rýstam Turysbekovke - 6 jyl qaýipsizdik deńgeıi tómen túzeý mekemesinde jazasyn óteýge jáne 7 jyl memlekettik qyzmette jumys isteý quqyǵynan aıyrýdy, Jaras Mashımbaevty - 4 jylǵa bas bostandyǵynan jáne ony da 7 jylǵa memlekettik qyzmette jumys isteý quqyǵynan aıyrýdy surady. Sondaı-aq Qaırat Altynbekulyn 5 jyl bas bostandyǵynan aıyrýdy jáne 6 jyl memlekettik qyzmette isteýge tyıym salyndy. Medeý Qalybekov - 4 jyl, Berik Abdýllaevqa - 4,5 jyl, al reeltor Nuraıym Aldanıshty 5 jylǵa bas bostandyǵynan aýyrý jazasyn surady.
Prokýrordyń sózinshe, zańsyz turǵyn úılerdi salý boıynsha sottalýshylardyń kinási qujatpen dáleldengen jáne kýágerlerdiń de dáleli bar. Sondaı-aq memlekettik aıyptaýshy barlyq úıqamaqta otyrǵan burynǵy sheneýnikterdi sot zalynda qamaýǵa alýdy surady.
Esterińizge sala keteıik, 2019 jyldyń 27- jeltoqsanyńda «Bek Air» áýe kompanııasynyń ushaǵy apatqa ushyrady. Almaty-Nur-Sultan baǵytyndaǵy ushaq bıiktikti saqtaı almaı, beton qorshaýyn buzyp ótken. Artynsha eki qabatty turǵyn úıge soǵyldy, 12 adam mert boldy, 69 adam zardap shekti. Onyń 51-i aýrýhanaǵa tústi.
