«Bek Air» ushaǵynyń apatty jaǵdaıda qonýyna qatysty isti QR Bas prokýratýrasy baqylaýǵa aldy
Bul týraly QR Bas kólik prokýratýrasynyń resmı ókili Ádilet Toqtamysov málim etti.
«Atalǵan fakt sot aldyndaǵy tergeý amaldarynyń biryńǵaı reestrine QR QK 344-babynyń 1-bólimine sáıkes tirkeldi. Qylmystyq is Bas kólik prokýratýrasynyń arnaıy prokýrorlarynyń óndirisine alyndy, sotqa deıingi tergeý amaldary júrgizilip jatyr», - dedi ol.
«Qazirgi ýaqytta prokýratýra organdaryna ushaq jolaýshylarynan eshqandaı shaǵym túsken joq. Jolaýshylar prokýratýra organdaryna jáne Azamattyq avıatsııa komıtetine shaǵymdana alady. Bul aryzdar «Zańdy jáne jeke tulǵalardyń shaǵymdaryn qaraý tártibi týraly» zańnyń aıasynda qaralatyn bolady», - dep túıdi sózin resmı ókil.
Aıta keteıik, 27 naýryz kúni «Bek Air» avıakompanııasynyń «Fokker-100» tıpti áýe kemesi « Qyzylorda-Astana» baǵdarymen reıs oryndaýy barysynda shassıdiń aldyńǵy tireý taǵanynyń isten shyǵýyna baılanysty apattyq jaǵdaıda jerge qonǵan bolatyn.
Keste boıynsha ushaq Astanaǵa 09.45-te qonýǵa tıis bolatyn. Alaıda shtattan tys jaǵdaıda órt shyǵý qaýpin meılinshe azaıtý qajet boldy. Osyǵan baılanysty ushaq áýede qosymsha 50 mınýttaı ýaqyt ushyp júrdi. Osy ýaqyt aralyǵynda Astana áýejaıy órt bolý qaýpiniń aldyn alý maqsatynda ushý-qoný jolaǵyn kóbikke toltyrdy. Qosymsha 7 órt tehnıkasy men 4 jedel járdem mashınasy ázirlendi.
Ushaq 10.36 -da qondy. Ushaq bortynda 116 jolaýshy men 5 ekıpaj múshesi boldy. Japa shekkender joq.
Áýejaıdyń, qalanyń shuǵyl qyzmetteriniń úılesimdi jumysy men áýe kemesi ekıpajynyń joǵary kásibıligin atap ótken jón.
Qazirgi ýaqytta QR IDM arnaıy komıssııasy quryldy. Zertteý nátıjesi keıinirek habarlanatyn bolady.