Bek Air ushaǵynyń apatyna baılanysty qylmystyq is qaıta qozǵalady

ASTANA. KAZINFORM — 2019 jyly Almaty mańynda Bek Air áýe kompanııasynyń ushaǵy apatqa ushyraǵan bolatyn. Osy qaıǵyly oqıǵaǵa baılanysty qylmystyq is boıynsha qaıtadan tergeý júrgiziledi. Bul aqparatty Úkimet úıinde ótip jatqan baspasóz máslıhatynda Kólik mınıstri Nurlan Saýranbaev rastady.

— Ókinishke qaraı, avıatsııada mundaı jaǵdaılar jıi bolyp turady jáne túpkilikti sheshim tabý óte qıynǵa soǵady. Avıatsııalyq apat óte uzaq qaralady. Qazirgi ýaqytta barlyq qujaty daıyndalyp jatyr, — dedi ol BAQ ókilderiniń saýalyna oraı. 

Sondaı-aq ol tilshilerdiń: «Atalǵan kompanııaǵa qatysty qylmystyq is qaıta tergele me?» degen saýalyna «ıá» dep jaýap berdi.

Eske sala ketsek, 2019 jyldyń 27 jeltoqsanynda Almatydan Astana qalasyna ushyp shyqqan Bek Air kompanııasynyń ushaǵy radardan joǵalyp ketti.

Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.

Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soǵylǵan. Saldarynan 12 adam qaza tapty. Osydan keıin Bek Air áýe kompanııasyna tıesili toǵyz Fokker-100 ushaǵynyń qyzmeti toqtatyldy.