Bek Air sotynda ushaq apatynyń beınejazbasy kórsetildi
ALMATY. KAZINFORM — Almatyda 2019 jyly bolǵan Bek Air ushaǵynyń apatyna qatysty sot jaryssózi ótti.
Túrksib aýdandyq sotyndaǵy aıyptalýshylar oryndyǵy bos tur. Sebebi is boıynsha aıyptalýshylar retinde kórsetilgen ushqyshtar — Meıirjan Moldaqulov pen Marat Muratbaev apat kezinde qaza tapqan.
Sot otyrysynda ushqyshtardyń advokaty Beıbit Kendirbaev qorǵaý tarapynyń múddesinde beınematerıaldar usyndy. Onda apat bolǵan kúngi oqıǵalardyń barysy egjeı-tegjeıli baıandalǵan. Beınejazbada eki ushqyshtyń da azamattyq avıatsııa salasynda mol tájirıbesi bolǵany atap ótiledi. Sol kúngi aýa raıy qolaıly bolǵan — aýa temperatýrasy mınýs 13–14 gradýs, jeldiń jyldamdyǵy 1–2 m/s shamasynda. Reıs 1996 jyly shyǵarylǵan Fokker-100 ushaǵymen oryndalǵan.
Ushaqtyń tehnıkalyq qyzmet kórsetýin áýe kompanııasynyń ınjenerlik-avıatsııalyq qyzmeti ornatylǵan standarttarǵa sáıkes júrgizgen. Ushýǵa deıin ekıpaj qajetti tekserýlerden ótip, ushaqty kózben qarap shyǵyp, onyń jaǵdaıyn qanaǵattanarlyq dep baǵalaǵan. Qosymsha qaýipsizdik sharasy retinde ushqyshtar stabılızatordy qaıtadan muzdanýǵa qarsy suıyqtyqpen óńdeýdi suraǵan.
Qorǵaý tarapy usynǵan nusqa boıynsha ushý jolaǵynda qozǵalysyn bastaǵan ushaq qajetti bıiktikke kóterile almaı, beton qorshaýdy buzyp ótip, zańsyz salynǵan eki qabatty turǵyn úımen soqtyǵysqan.
Búgingi sot otyrysynda jábirlenýshi taraptyń advokaty qaza tapqan ushqyshtardy aqtap, olardyń ornyna «Almaty halyqaralyq áýejaıy» AQ qyzmetkerlerin jaýapqa tartýdy surady.
Al ushqyshtardyń áıelderi taǵylǵan aıypqa narazylyq bildirdi.
Buǵan deıin sotta Bek Air ushaq apatynyń sebebin dálirek anyqtaý úshin jasandy ıntellekt saraptamasyn paıdalaný usynyldy. Sondaı-aq sot Bek Air áýe kompanııasynyń múlkine shekteý qoıdy.
Eske salaıyq, 2019 jyldyń 27 jeltoqsanynda Almatydan Astana qalasyna ushyp shyqqan Bek Air kompanııasynyń ushaǵy radardan joǵalyp ketti. Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.
Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soǵylǵan. Saldarynan 12 adam qaza tapty. Osydan keıin Bek Air áýe kompanııasyna tıesili toǵyz Fokker-100 ushaǵynyń qyzmeti toqtatyldy.