Bek Air jolaýshylaryna áýede zaqym kelgen be - sarapshy qorytyndysy

ALMATY. KAZINFORM – Almatyda 2019 jyly bolǵan Bek Air ushaǵynyń apatqa ushyraýyna baılanysty sot otyrysy ótti.

Sot otyrysynda tájirıbeli sot-medıtsınalyq sarapshy Rahımjan Abdýkarımov áýe kemesiniń apaty kezinde adamdardyń ólimine ne sebep bolǵanyn túsindirdi.

- Mundaǵy jaraqat neden bolǵany anyq. Jermen qozǵalyp kele jatqan ushaqtyń turǵyn úıge soǵylýy ekıpaj músheleri men keı jolaýshylardyń ólimine ákelgen. Soqqy nátıjesinde ushaqtyń qurylymy ishinara qırap, ekıpaj ben jolaýshylar jaraqat alǵan, – dedi Rahımjan Abdýkarımov.

Sarapshynyń pikirinshe, eger ushaq jolynda úı bolmaǵanda áýe kemesi jaı ǵana alqap boıymen syrǵyp baryp ózdiginen toqtaıtyn edi.

- Ekıpaj ben jolaýshylarda avıatsııalyq jaraqatqa tán belgiler bolǵan joq, bul aldyńǵy qorytyndyny dáleldeıdi. ıAǵnı, ushaq bıiktikten qulap, jerge qatty soǵylǵan kezde bolatyn jaraqattar anyqtalǵan joq. Apat kezinde áýe kemesi eleýli bıiktikten qulaǵan joq, qurylymynda da aıtarlyqtaı qıraý, jarylys nemese órt bolmaǵan. Qarapaıym tilmen aıtqanda – úı bolmaǵanda, adam shyǵyny da bolmas edi, – dedi sarapshy.

Buǵan deıin sotta Bek Air ushaq apaty boıynsha apattyń sebebin dálirek anyqtaý úshin jasandy ıntellekt (JI) saraptamasyn paıdalaný usynyldy.

Eske salaıyq, 2019 jyldyń 27 jeltoqsanynda Almatydan Astana qalasyna ushyp shyqqan Bek Air kompanııasynyń ushaǵy radardan joǵalyp ketti.

Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.

Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetinde eki qabatty úıge soǵylǵan. Saldarynan 12 adam qaza tapty. Osydan keıin Bek Air áýe kompanııasyna tıesili toǵyz Fokker-100 ushaǵynyń qyzmeti toqtatyldy.

2021 jyly Almaty oblysynyń Talǵar aýdandyq soty áýejaı mańyndaǵy jer ýchaskelerin zańsyz satqan burynǵy sheneýnikter men rıeltorǵa qatysty úkim shyǵardy.