Bek Air soty: advokat Almaty áýejaıy men Azamattyq avıatsııa komıteti qyzmetkerlerine aıyp taqty
ALMATY. KAZINFORM – Almatyda 2019 jyly bolǵan Bek Air ushaǵynyń apatyna qatysty sot jaryssózi jalǵasyp jatyr.
Túrksib aýdandyq sotyndaǵy aıyptalýshylar oryndyǵy bos tur. Sebebi is boıynsha aıyptalýshylar retinde kórsetilgen ushqyshtar – Meıirjan Moldaqulov pen Marat Muratbaev apat kezinde qaza tapqan. Buǵan deıin sotta prokýror Aıdos Palmanov ushaq apatyna áýe kemesin basqarǵan ushqyshtar kináli ekenin aıtty.
Búgingi sot otyrysynda jábirlenýshi taraptyń advokaty Nurlan Halıkov qaza tapqan ushqyshtardy aqtap, olardyń ornyna «Almaty halyqaralyq áýejaıy» AQ qyzmetkerlerin jaýapqa tartýdy surady. Onyń aıtýynsha, áýejaı qyzmetkerleriniń óz mindetterin tıisti deńgeıde oryndamaýy apatqa sebep bolǵan.
Fokker-100 ushaǵy áýejaıdyń qorshaýynan nebári toǵyz metr qashyqtyqta ornalasqan ǵımaratqa soǵylǵan. Onyń saldarynan 12 adam kóz jumdy. Advokat sanıtarlyq-qorǵaý aımaǵyndaǵy zańsyz qurylystar ýaqtyly anyqtalyp, joıylǵan bolsa, ushyp-qoný qaýipsizdigi qamtamasyz etilgen bolaryn atap ótti.
Sonymen qatar ol ushaqqa muzdanýǵa qarsy suıyqtyqty jaǵý kezinde de óreskel buzýshylyqtar bolǵanyna toqtaldy. Onyń pikirinshe, bul da apatqa áser etken bolýy múmkin.
— Jınalǵan dálelder jıyntyǵy Qylmystyq kodekstiń 254-babynda (Mindetterine adal qaramaý) kózdelgen quqyq buzýshylyq belgilerin kórsetedi, — dedi advokat.
Sondaı-aq Nurlan Halıkov aldyn ala tergeýdiń sapasyz júrgizilgenin jáne prokýror tarapynan qadaǵalaýdyń jetkiliksiz bolǵanyn atap ótti. Ol sottan osy jóninde jeke qaýly shyǵarýdy ótindi.
Jábirlenýshilerdiń taǵy bir advokaty – Sergeı Derjavets te bul ustanymdy qoldady. Onyń sózinshe, tergeý barysynda kóptegen zańbuzýshylyqtarǵa jol berilgen, al Almaty áýejaıy men Azamattyq avıatsııa komıteti qyzmetkerleriniń kinási bastapqydan-aq aıqyn bolǵanymen, olardyń áreketterine tıisti quqyqtyq baǵa berilmegen.
Ol sottan ushqyshtardy Qylmystyq kodekstiń 344-babynyń 3-bóligi boıynsha aqtaýdy jáne Almaty áýejaıy men Kólik mınıstrligine qarasty Azamattyq avıatsııa komıtetiniń laýazymdy tulǵalaryna qatysty materıaldardy jeke óndiriske bólýdi surady. Qorǵaýshylar pikirinshe, olardyń is-áreketinde 254-bap (Mindetterine adal qaramaý) jáne 351-bap (Kóliktiń qaýipsiz jumys isteýin qamtamasyz etetin qaǵıdalardy buzý) boıynsha qylmystyq quqyq buzýshylyq belgileri bar.
Buǵan deıin sotta Bek Air ushaq apatynyń sebebin dálirek anyqtaý úshin jasandy ıntellekt saraptamasyn paıdalaný usynyldy.
Sondaı-aq sot Bek Air áýe kompanııasynyń múlkine shekteý qoıdy.
Eske salaıyq, 2019 jyldyń 27 jeltoqsanynda Almatydan Astana qalasyna ushyp shyqqan Bek Air kompanııasynyń ushaǵy radardan joǵalyp ketti. Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.
Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soǵylǵan. Saldarynan 12 adam qaza tapty. Osydan keıin Bek Air áýe kompanııasyna tıesili toǵyz Fokker-100 ushaǵynyń qyzmeti toqtatyldy.
2021 jyly Almaty oblysynyń Talǵar aýdandyq soty áýejaı mańyndaǵy jer ýchaskelerin zańsyz satqan burynǵy sheneýnikter men rıeltorǵa qatysty úkim shyǵardy.