Bek Air kompanııasy Fokker-100 ushaqtaryn satpaıtyn boldy
ALMATY. KAZINFORM — 2019 jylǵy ushaq apatynan keıin qyzmetin toqtatqan Bek Air kompanııasy eki Fokker-100 ushaǵyn satylymǵa shyǵarǵan edi.
Alaıda aýktsıon saýda bastalmaı turyp toqtatylǵan. Saýda búgin saǵat 11:00–de ótýi qajet edi.
Buǵan deıin Bek Air saýda-sattyqtyń elektrondy alańynda eki Fokker-100 ushaǵyn satylymǵa ótken aptada qoıǵan. Lottyń bastapqy baǵasy — 104,4 mln teńge, al eń tómengi baǵa — 67,9 mln teńge boldy. Ushaqtardyń kedendik bereshekke baılanysty shekteýi bar.
Áýe kompanııanyń málimetinshe, atalǵan eki ushaq 2019 jyldyń jeltoqsan aıynan beri paıdalanylmaǵan jáne olarǵa tehnıkalyq qyzmet kórsetilmegen. Ushaqtardyń jaramdylyǵyn qalpyna keltirý úshin agregattar men toraptardy, borttyq júıeler men avıondyq jabdyqty tekserý jáne aýystyrýdy qosa alǵanda, aýqymdy jumys atqarý qajet.
Aldyn ala esepteýler boıynsha, bir Fokker-100 ushaǵyn qalpyna keltirýge 2–2,6 mln AQSh dollary ketedi.
Eske salsaq, 2019 jyldyń 27 jeltoqsanynda Almatydan Astana qalasyna ushyp shyqqan Bek Air kompanııasynyń ushaǵy radardan joǵalyp ketti. Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.
Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soǵylǵan. Saldarynan 12 adam qaza tapty. Osydan keıin Bek Air áýe kompanııasyna tıesili toǵyz Fokker-100 ushaǵynyń qyzmeti toqtatyldy.
2024 jyly Almaty mańynda apatqa ushyraǵan Bek Air ushaǵyna qatysty tergeý aıaqtaldy.