Bek Air kompanııasy eki Fokker-100 ushaǵyn satylymǵa shyǵardy
ALMATY. KAZINFORM – 2019 jylǵy ushaq apatynan keıin qyzmetin toqtatqan Bek Air kompanııasy eki Fokker-100 ushaǵyn satylymǵa shyǵardy.
Saýda-sattyqtyń elektrondy alańynda jarııalanǵan aqparatqa sáıkes, satylymǵa shyqqan Fokker-100 ushaqtarynyń tirkeý nómirleri: UP-F1018 (1991 jyly shyǵarylǵan) jáne UP-F1019 (1990 jyly shyǵarylǵan).
Lottyń bastapqy baǵasy – 104,4 mln teńge, al eń tómengi baǵa – 67,9 mln teńge. Saýda 26 maýsym kúni saǵat 11:00-de ótedi. Ushaqtardyń kedendik bereshekke baılanysty shekteýi bar.
Áýe kompanııanyń málimetinshe, atalǵan eki ushaq 2019 jyldyń jeltoqsan aıynan beri paıdalanylmaǵan jáne olarǵa tehnıkalyq qyzmet kórsetilmegen.
Avıatsııalyq tehnıkany jóndeý jáne qyzmet kórsetý boıynsha sheteldik kompanııalardyń qorytyndysyna sáıkes, 2019 jyldan 2025 jylǵa deıingi aralyqta ushaqtarǵa tıisti tehnıkalyq qyzmet kórsetilmegendikten olar jaramsyz kúıge túsken. Ushaqtardyń jaramdylyǵyn qalpyna keltirý úshin agregattar men toraptardy, borttyq júıeler men avıondyq jabdyqty tekserý jáne aýystyrýdy qosa alǵanda, aýqymdy jumys atqarý qajet.
Aldyn ala esepteýler boıynsha, bir Fokker-100 ushaǵyn qalpyna keltirýge 2–2,6 mln AQSh dollary ketedi.
Eske salaıyq, 2019 jyldyń 27 jeltoqsanynda Almatydan Astana qalasyna ushyp shyqqan Bek Air kompanııasynyń ushaǵy radardan joǵalyp ketti. Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.
Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soǵylǵan. Saldarynan 12 adam qaza tapty. Osydan keıin Bek Air áýe kompanııasyna tıesili toǵyz Fokker-100 ushaǵynyń qyzmeti toqtatyldy.
2024 jyly Almaty mańynda apatqa ushyraǵan Bek Air ushaǵyna qatysty tergeý aıaqtaldy.