Bek Air ıesi urlyq jasady degen kúdikpen qamaýǵa alyndy
ALMATY. KAZINFORM — Almatyda Bek Air áýekompanııasynyń ıesi Nurlan Jumasultanov ushaq qozǵaltqyshtaryn asa iri mólsherde urlady degen kúdikpen ustalyp, eki aıǵa qamaldy.
UQK Kazinform tilshisine tergeý júrgizilip jatqanyn rastady.
Tergeý nusqasyna qaraǵanda, áýejaıda joǵalǵan qozǵaltqyshtardyń biri keıin 2019 jylǵy áýe apatyna ushyraǵan Bek Air ushaǵynan tabylǵan.
2019 jyldyń 27 jeltoqsanynda Almatydan Astana qalasyna ushyp shyqqan Bek Air kompanııasynyń ushaǵy radardan joǵalyp ketti. Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany belgili boldy.
Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soǵylǵan edi. Saldarynan 12 adam qaza tapty.
Birneshe jyldan keıin apatqa qatysty qylmystyq is boıynsha ushaq ekıpajynyń músheleri kináli dep tanylyp, olar qaıtys bolǵannan keıin sottaldy.
Osy ispen qatar Almaty áýejaıy aýmaǵynda saqtalǵan Fokker-100 ushaqtarynyń qozǵaltqyshtarynyń joǵalýyna qatysty bólek tergeý júrgizildi.
Qozǵaltqyshtardyń urlanǵanyn rastaıtyn beınejazba nemese kýágerler bolǵan joq. Alaıda keıin apatqa ushyraǵan ushaqtyń bir qozǵaltqyshy buryn joǵalǵan agregattardyń biri ekeni anyqtalǵan. Ony serııalyq nómiri arqyly taýypty.
Tergeýshiler qozǵaltqyshtyń konservatsııada turǵan ushaqtan alynyp, keıin Bek Air áýekompanııasyna tıesili basqa ushaqqa ornatylǵanyn anyqtady.
Bıyl bas kólik prokýratýrasy qylmystyq isti ulttyq qaýipsizdik komıtetine bergen.
Komıtet tergeýshileri qozǵaltqyshtyń Bek Air ushaǵynda bolǵanyn eskerip, áýekompanııasynyń ıeleri ne basshylarynyń iske qatysy bolýy múmkin dep boljady.
Alǵashynda Nurlan Jumasultanov jaýap alýǵa shaqyryldy. Jaýaptan soń ol kúdikti dep tanyldy. 9 qyrkúıekte Almaty qalasynyń tergeý soty ony eki aı merzimge qamaýǵa alý týraly sheshim shyǵardy. Qylmystyq is boıynsha taǵy bir adam úıqamaqqa alynǵan.
Oǵan Qylmystyq kodekstiń 188-baby 4-bóligi «Asa iri mólsherde urlyq» boıynsha aıyp taǵyldy. Kináli dep tanylsa, 5 jyldan 10 jylǵa deıin bas bostandyǵynan aıyrylyp, múlkin tárkilenýi múmkin.
Eske salaıyq, Bek Air apatynyń jábirlenýshilerine ótemaqy tóleý máselesi azamattyq sotta qaralatyny aıtyldy.
