Bek Air áýe kompanııasy ushaǵynyń apatqa ushyraýyn tergeý qaıta bastalady

ASTANA. KAZINFORM – Bek Air áýe kompanııasy ushaǵynyń apatqa ushyraýyn tergeý qaıta bastalady. Bul týraly Kólik mınıstri Marat Qarabaev aıtty.

- Tergeý aıaqtaldy. Biraq, qazirgi ýaqytta áýe kompanııasynyń bir qyzmetkeriniń ótinishi bar. Oǵan sáıkes, protsedýralyq turǵynda tergeýdi qaıta bastaý máselesi qarastyrylady, - dedi mınıstr Májilistegi eldiń kólik-logıstıkalyq áleýetin damytýǵa arnalǵan Úkimet saǵatynan keıingi brıfıngte.

Aıta keteıik, osy jyldyń sáýirinde Kóliktegi polıtsııa departamenti protsess prokýrormen kelise otyryp, Almaty áýejaıynda 2019 jyldyń 27 jeltoqsanynda bolǵan Bek Air kompanııasy «Fokker-100» ushaǵynyń apatqa ushyraý faktisi týraly qylmystyq is boıynsha tergeý áreketteriniń aıaqtalǵanyn habarlaǵan edi.

Eske sala ketsek, 2019 jyldyń 27 jeltoqsanynda Almatydan Nur-Sultan qalasyna ushyp shyqqan Bek Air kompanııasynyń ushaǵy radardan joǵalyp ketti.

Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.

Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soǵylǵan. Saldarynan 12 adam qaza tapty. Osydan keıin Bek Air áýe kompanııasyna tıesili toǵyz Fokker-100 ushaǵynyń qyzmeti toqtatyldy.

«Bek Air» ushaǵynyń apatqa ushyraýyna qatysty qylmystyq is boıynsha tergeý aıaqtalǵanyn jazǵan bolatynbyz.