Bek Air artynda qandaı yqpaldy adam tursa da ádildik saltanat qurýy tıis — Bozymbaev

ASTANA. KAZINFORM — Bek Air ushaǵy apaty kezinde qaza tapqan adamdardyń týystary ótemaqy alýy tıis. Bul týraly Úkimet úıinde ótip jatqan baspasóz máslıhatynda Premer-mınıstrdiń orynbasary Qanat Bozymbaev aıtty.

Іs-shara barysynda BAQ ókilderi vıtse-premerden: «qaza tapqan ushqyshtardyń týystaryna zardap shekkenderge ótemaqy tóleýdi mindetteý qanshalyqty ádil bolmaq? Birneshe jyl ótkennen keıin tergeýdi qaıta bastaý ne úshin qajet? Neni anyqtaǵysy keledi?» dep suraǵan edi.

Saýalǵa jaýap bergen Úkimet basshysynyń orynbasary ushqyshtardyń týystaryna ótemaqy tóleýdi mindetteý qanshalyqty ádil ne ádil emestigin sot sheshýi tıistigin basa aıtty.

— Múmkin bul ushqyshtardyń kinási de emes shyǵar. Tergeý sońǵy núktesin qoıýy tıis. Óte kóp adam qaza tapty. Meniń jeke pikirim, Bek Air artynda qandaı yqpaldy adamdar tursa da ádildik saltanat qurýy tıis. Adamdar týystary qaza tapqany úshin ótemaqy alýy qajet, — dedi Qanat Bozymbaev.

Eske sala ketsek, 2019 jyldyń 27 jeltoqsanynda Almatydan Astana qalasyna ushyp shyqqan Bek Air kompanııasynyń ushaǵy radardan joǵalyp ketti. 

Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.

Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soqtyǵysqan. Saldarynan 12 adam qaza tapty. Osydan keıin Bek Air áýe kompanııasyna tıesili toǵyz Fokker-100 ushaǵynyń qyzmeti toqtatyldy.

Al 31 tamyzda Úkimet úıinde ótken baspasóz máslıhatynda Kólik mınıstri Nurlan Saýranbaev Bek Air ushaǵynyń apatyna baılanysty qylmystyq is qaıta qozǵalǵanyn rastady.