Bek Air apatynyń jábirlenýshilerine ótemaqy tóleý máselesi azamattyq sotta qaralady

ALMATY. KAZINFORM – Almatyda 2019 jyly bolǵan Bek Air ushaǵynyń apatyna qatysty sot úkimi shyqty.

Úkimdi jarııalaý kezinde sýdıa is boıynsha jábirlenýshilerdiń azamattyq talap-aryzyn qanaǵattandyrý quqyǵy saqtalatynyn, alaıda onyń mólsherine qatysty másele azamattyq sottyń qaraýyna beriletinin aıtty.

Sondyqtan Bek Air kompanııasynyń múlkine qoıylǵan shekteý, sondaı-aq kompanııa esepshottaryndaǵy aqshalaı qarajat bul talap-aryzdar azamattyq is júrgizý tártibimen qaralyp, sheshim qabyldanǵanǵa deıin saqtalady.

Eske salaıyq, sot ómirden ótken ushqyshtar — Meıirjan Moldaqulov pen Marat Muratbaevty Qylmystyq kodeksiniń 344-babynyń 3-bóligi boıynsha kináli dep tanydy. 

Jaryssóz kezeńinde prokýror Aıdos Palmanov ushaq apatyna áýe kemesin basqarǵan ushqyshtar kináli ekenin aıtty.

Al jábirlenýshi taraptyń advokaty qaza tapqan ushqyshtardy aqtap, olardyń ornyna Almaty halyqaralyq áýejaıy men Azamattyq avıatsııa komıteti qyzmetkerlerin jaýapqa tartýdy surady.

Sondaı-aq ushqyshtardyń áıelderi taǵylǵan aıypqa narazylyq bildirdi.

Sot barysynda Bek Air áýe kompanııasynyń múlkine shekteý qoıdy.

Eske salaıyq, 2019 jyldyń 27 jeltoqsanynda Almatydan Astana qalasyna ushyp shyqqan Bek Air kompanııasynyń ushaǵy radardan joǵalyp ketti. Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.

Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soǵylǵan. Saldarynan 12 adam qaza tapty. Osydan keıin Bek Air áýe kompanııasyna tıesili toǵyz Fokker-100 ushaǵynyń qyzmeti toqtatyldy.