Beeline kompanııasy ótken jyly iske asyrǵan áleýmettik jobalaryn qortyndylady

Beeline ótken jyly áleýmettik baǵyttaǵy birneshe jobalardyń seriktesi boldy. Mamyr aıynda keń kólemde «Maıdandastarǵa qońyraý» aktsııasyn ótkizip, Beeline Qazaqstan boıynsha barlyq Uly Otan soǵysynyń ardagerlerine álemniń kez kelgen túkpirindegi jaqyndaryna, maıdandas dostaryna tegin qońyraý shalýyna múmkindik berdi. Búgin Almatydaǵy baspasóz máslıhatynda «KaR Tel» JShS-niń Bas dırektory Anatolıı Popov osylaı aıtty.

Onyń sózine qaraǵanda, Beeline kompanııasy Qazaqstanda qyzmet etken jyldarynda áleýmettik jaýapkershilikti seziný jáne júrgizý mádenıetin qalyptastyrdy. «Beeline san salaly, sonyń ishinde áleýmettik saıasatta da biz óz qyzmetkerlerimizge arnalǵan ishki baǵdarlamany, bilim, mádenıet jáne sportqa baǵyttalǵan syrtqy baǵdarlamany da dástúrli júrgizip kelemiz»,- deıdi A. Popov.

Sonymen qatar kompanııa balalar úıi men ınternattarǵa kómekti elimiz boıynsha kórsetip keledi. Kompanııa fılıalynyń árbirinde qamqorlyqqa alynǵan balalar uıymdary bar. Bıylǵy jyly Beeline kompanııasy «Mektepke jol» respýblıkalyq jobasyna belsene qatysyp, az qamtylǵan otbasylardyń birneshe júz balalaryn mektep kıimi men oqý quraldarymen qamtamasyz etti. Beeline qaıyrymdylyq baǵyttaǵy qarjy jınaý aktsııasyn da qoldady. 2007 jyly «Mıloserdıe» erikti qoǵamy» qaıyrymdylyq qorymen birigip, «Balalarǵa ómir syıla» SMS jobasyn júzege asyrdy. Beeline abonentteriniń kómegimen osy aktsııa barysynda naýqasy aýyr balalardyń emdelýine 14 mln teńge qarajat jınaldy.

2010 jyly Almaty oblysy, Qyzylaǵash aýylynyń sý tasqynan zardap shekken turǵyndaryna arnap sms jobasy uıymdastyrylyp, nátıjesinde bir mıllıonnan astam teńge qarajat jınalǵan.

Sondaı-aq Beeline memlekettik tildi damytýǵa súbeli úles qosyp keledi. Ótken jyly Beeline Qazaqstanda alǵash bolyp qazaq tildi jýrnalısterge arnap semınar -trenıng ótkizdi. Elimizdiń aımaqtarynda memlekettik tildi damytý jáne qoldaý baǵytynda «Abaı oqýlary», «Seriler syny» taǵy da basqa sharalardy ótkizýdi qolǵa aldy.