Beeline, Kcell jáne Tele2 uıaly baılanys operatoryna qatysty tergeý toqtatyldy – agenttik

ASTANA. KAZINFORM – Bıyl naýryzda KCell, Tele2, Beeline kompanııalarynyń ústinen tarıf kóterý týraly «sóz baılasý» kúdigimen tekserý bastalǵan edi. Tergeý barysy týraly Básekelestikti qorǵaý jáne damytý agenttigi tóraǵasynyń orynbasary Bolat Sámbetov aıtyp berdi.

- Iá, bizdiń tarapymyzdan tekserý jumystary júrgizildi. Bul barshaǵa belgili fakt dep oılaımyn. Bárimiz de uıaly baılanys qyzmetin paıdalanamyz, osy oraıda biz taldaý júrgizdik. Sońǵy birneshe jylda uıaly baılanys qyzmetiniń baǵasy aıtarlyqtaı óskeni baıqalady. Bizdiń tarapymyzdan aldyn ala quqyq buzýshylyq belgileri anyqtaldy, - dedi Bolat Sámbetov ortalyq kommýnıkatsııalar qyzmeti alańynda ótken baspasóz máslıhatynda. 

Osylaısha, agenttik basshysynyń orynbasary barlyq uıaly baılanys operatoryna qatysty tergep-tekserý jumysynyń áli aıaqtalmaǵanyn aıtyp otyr. Onyń ishinde Beeline, Kcell jáne Tele2 kompanııasy bar. 

- Biz osy úsh kompanııa arasynda sóz baılasý belgilerin anyqtap, tergeýdi bastadyq. Biraq, qazir tergeý toqtatyldy. Búginde sot protsesi júrip jatyr, óıtkeni kompanııalar bizdiń áreketimizge shaǵym túsirdi, qazir is sotta qaralyp jatyr, - dep tolyqtyrdy ol. 

Eske salsaq, jyl basynda uıaly baılanys operatorlarynyń tarıfti negizsiz kóterý áreketteri qaralyp jatqany týraly habarlaǵan edik.