Beeline Qazaqstan OLX onlaın-jarnama platformasyn satyp aldy

ASTANA. KAZINFORM – Beeline Qazaqstan VEON tobyna kiretin kompanııa elimizdiń eń iri onlaın-jarnama platformasy OLX Qazaqstandy 75 mıllıon AQSh dollaryna satyp aldy.

VEON tobynyń bas dırektory Kaan Terzıoglýnyń sózinshe, «OLX Qazaqstandy» satyp alý tsıfrlyq qyzmetterimizdi keńeıtýge úlken múmkindik beredi.

– OLX Qazaqstan komandasyn VEON otbasyna qosqanymyzǵa qýanyshtymyz. Bul kelisim tsıfrlyq operator strategııasyn damytýda jańa múmkindikter ashady, - dedi Kaan Terzıoglý.

OLX Qazaqstan platformasyna aı saıyn 10 mıllıonnan astam belsendi qoldanýshy tirkelip, 3,6 mıllıon habarlandyrý ornalastyrylǵan. Bul kórsetkish Qazaqstandaǵy ınternet qoldanýshylarynyń 52 paıyzdan astamyn qamtıdy.

Beeline Qazaqstannyń bas dırektory Evgenıı Nastradınniń aıtýynsha, OLX Qazaqstan – elimizdegi eń iri onlaın-jarnama platformasy.

– Biz ony Beeline ekojúıesine biriktirip, tutynýshylarǵa keshendi jáne keńeıtilgen tsıfrlyq qyzmetter usynamyz. Bul platforma jańa qoldanýshylardy tartyp, naryqtaǵy ornymyzdy nyǵaıtýǵa septigin tıgizedi, - deıdi ol. 

Bıyl naýryzda KCell, Tele2, Beeline kompanııalarynyń ústinen tarıf kóterý týraly «sóz baılasý» kúdigimen tekseris júrgizilgen bolatyn.