Beeline 3G jelisin aýyldyq eldi mekenderde iske qosty
ALMATY. 14 aqpan. QazAqparat /Názıra Eleýhan/ - Beeline kompanııasy Qazaqstandaǵy 3G jelisimen qamtý aýmaǵyn keńeıtip jatyr.
Endi 3G tehnologııasy alys eldi meken turǵyndaryna da qol jetimdi bolady. Bul týraly búgin Almatyda «KaR-Tel» JShS-niń Bas dırektory Anatolıı Popov málim etti.
Onyń aıtýynsha, qazirgi ýaqytta Qaskeleń, Fabrıkalyq, Shilik, Shıeli, Jalaǵash, Jańaqorǵan, Belbulaq jáne Merke aýyldary 3G standartty jelisimen qamtylǵan. «Endi jyl sońyna deıin Beeline úshinshi urpaq baılanysy jelisin basqa da iri eldi mekenderde qurýdy josparlap otyr. Negizinen, shaǵyn qalalar men eldi mekenderde sapaly qyzmet kórsetý - bizdiń 2011 jylǵa arnalǵan josparly jumystarymyzdyń basymdy baǵyttarynyń biri», - deıdi Anatolıı Popov.
Onyń pikirinshe, 3G jelisi bıznes salasyn júrgizýge tıimdi jaǵdaı jasap, aýyl turǵyndarynyń ómirlerin jaqsy qalypqa keltirip, eldi-meken aımaqtarynyń ekonomıkalyq damýyna tyń serpin bermek.
Esterińizge sala ketsek, Beeline-nyń 3G tehnologııasyn birinshi bolyp Almaty jáne Astana qalalarynyń turǵyndary baǵalady. 2010 jyldyń 1 jeltoqsanynda Beeline atalmysh qalalarda úshinshi urpaq baılanysyn iske qosqan bolatyn. Búginde 3G tehnologııasyn Aqsaı, Aqsý (Pavlodar oblysy), Aqtaý, Aqtóbe, Almaty, Atyraý, Astana, Balqash, Jezqazǵan, Zyrıanov, Qapshaǵaı, Qaraǵandy, Qarataý, Kókshetaý, Qostanaı, Qyzylorda, Óskemen, Pavlodar, Petropavl, Semeı, Taldyqorǵan, Sátpaev, Serebrıan, Taraz, Tekeli, Túrkistan, Oral, Úsharal, Shymkent, Talǵar, Temirtaý qalalarynda paıdalana alady.
