«Bedeýlikti emdeımin»: Almatyda ózin medqyzmetkermin dep tanystyrǵan alaıaq áıel ustaldy
ALMATY. QazAqparat - Almatyda ózin medıtsına qyzmetkeri retinde tanystyrǵan áıel qamaýǵa alyndy, dep habarlaıdy QazAqparat tilshisi.
Ózin medıtsına qyzmetkerimin dep tanystyrǵan áıel balasy joq áıelderdi bedeýlikten emdeımin dep ýáde bergen.
Alaıda, is júzinde N. esimdi azamatsha 1986 jyly Qytaıda týǵan, buryn sottalǵan jáne izdeýde bolǵan.
«Almaty oblysyndaǵy áriptesterimizdiń N. atty azamatshany alaıaqtyq jasaǵany úshin izdegeni anyqtaldy. Belgili bolǵandaı, sot bıliginen jasyrynyp júrgen qylmysker taǵy birneshe zańsyz áreket jasaǵan. Ózin medıtsına mekemesiniń qyzmetkeri retinde tanystyrǵan ol azamattarǵa bedeýlikti emdeımin jáne gınekologııa salasyndaǵy basqa da aýyr medıtsınalyq manıpýlıatsııalardy júrgizemin dep ýáde berip, ol úshin aldyn ala syıaqy talap etken. Zardap shekkendermen kezdesken kezde ózin «Altynaı» dep tanystyrǵan», – dedi Túrksib aýdandyq polıtsııa basqarmasy janyndaǵy bólim bastyǵy Erlan Aıanbaev.
Qazir kúdikti qamaýda. Sotqa deıingi tergeý Qylmystyq kodekstiń 190-baby boıynsha júrgizilýde.
Polıtsııa basqarmasyndaǵylar alaıaqtyq áreket jasady degen kúdikke ilingen áıeldiń sýretin jarııalap, onyń áreketinen zardap shekken azamattar bolsa 295-54-61; 8-775-718-35-05 jáne 8-701-758-67-60 telefondar nómirine habarlasýlaryn suraıdy.
