Bedeýlik máselesi medıtsınalyq saqtandyrý arqyly sheshilmek – MÁMS sarapshysy

PETROPAVL. QazAqparat – Petropavlda memlekettik qyzmetter jármeńkesi ótip, áleýmettik medıtsınalyq saqtandyrý qorynyń mamandary kelýshilerge jańa júıeniń artyqshylyqtaryn túsindirdi, dep habarlaıdy QazAqparat tilshisi.

Petropavlda jıyrmaǵa jýyq túrli mekemelerdiń ókilderi qala turǵyndaryn qabyldap, saýaldaryna jaýap berdi. Suraqtardyń deni balabaqsha, baspana kezegi, salyq boıynsha qoıyldy. 2020 jyly mindetti áleýmettik medıtsınalyq saqtandyrý júıesi iske qosylady. Turǵyndardyń bul bastamaǵa qatysty saýaldary kóp.

«Áleýmettik medıtsınalyq saqtandyrý qory» KEAQ SQOF halyqty aqparattandyrý jáne ótinishterdi qaraý bóliminiń bas sarapshysy Qarlyǵash Іlııasova emdeý mekemeleriniń kelesi jyly naýqastardy qalaı qabyldaıtyndyǵy jaıynda, qandaı qyzmetter tegin kórsetilip, al medıtsınalyq saqtandyrý esebinen qandaı em-dom alýǵa bolatynyn aıtyp berdi.

Petropavl qalasynyń turǵyny memlekettik qyzmetter jármeńkesiniń bolatynyn bilip, arnaıy kelipti. Ol birneshe jyldan beri bala súıe almaı júr. Endi onyń bar úmiti - ekstrakorporaldyq uryqtandyrý protsedýrasynda. Alaıda onyń quny 1 mln teńge turady, bul jas otbasy úshin úlken soma.

«Áleýmettik medıtsınalyq saqtandyrý qory» KEAQ SQOF bas sarapshysy Qarlyǵash Іlııasovanyń sózine qaraǵanda, kelesi jyldan bastap qazaqstandyq bedeý áıelder ekstrakorporaldyq uryqtandyrý protsedýrasyn medıtsınalyq saqtandyrý esebinen óte alady. Baǵasy qymbat em-dom men operatsııa Áleýmettik medıtsınalyq saqtandyrý qory esebinen júrgiziledi.

EKU protsedýrasy mindetti áleýmettik medıtsınalyq saqtandyrý paketine qosylǵan. Mamandardyń málimetinshe, Qazaqstanda probırkadan shyqqan alǵashqy bala 1996 jyly týǵan. Sodan beri osyndaı protsedýranyń arqasynda elimizde 16 myńnan astam bala dúnıege keldi.