Bederli óner barelef: qabyrǵaǵa jan bitirgen sheber
AQTAÝ. KAZINFORM —Sońǵy jyldary ınterer dızaınynda biregeılikke suranys artyp keledi. Mamandardyń aıtýynsha, qazirgi tańda turǵyndar standartty árleý tásilderinen góri avtorlyq jumystarǵa kóbirek mán bere bastaǵan. Osyndaı baǵyttardyń biri — barelef óneri. Osy ónerdi kásibı túrde meńgerip, kóptegen turǵyn úı men kommertsııalyq nysannyń ıntererin bezendirip júrgen sheberlerdiń biri — Nazerke Qubyǵulqyzymen Kazinform tilshisi suhbattasty.
Balalyq armannan bastalǵan jol
Nazerkeniń barelef ónerine kelýi kezdeısoq emes. Ol Mańǵystaý oblysynyń Taýshyq aýylynda kópbalaly otbasynda dúnıege kelgen. Keıipkerimizdiń aıtýynsha, ıntererge degen qyzyǵýshylyǵy bala kezden qalyptasqan.
— Bala kúnimde eski, shaǵyn úıde turdyq. Úıimizdi jyl saıyn jańartyp, túsqaǵazdaryn aýystyryp, qoldan kelgenshe ásemdeýge tyrysatynbyz. Ádemi úıde turý týraly bala kezdegi armanym keıin úıdi árleýge degen qyzyǵýshylyqqa ulasty, — deıdi Nazerke Qubyǵulqyzy.
Mektepti támamdaǵan soń ol Almatydaǵy Kaspıı qoǵamdyq ýnıversıtetinde sáýletshi mamandyǵy boıynsha bilim alǵan. Alaıda kásibı jolyn tek sáýletpen shektemeı, shyǵarmashylyq baǵytyn da qatar damytqan. Keıipkerimizdiń sózinshe, qoǵamda óner salasymen turaqty tabys tabý qıyn degen túsinik qalyptasqan. Soǵan qaramastan ol boıyndaǵy sýretshilik qabiletin damytýǵa bel býǵan.
Al, barelef ónerimen alǵash ret áleýmettik jeliler arqyly tanysqan. Bul — kóne dáýirlerden bastaý alatyn sándik-qoldanbaly ónerdiń erekshe túri. Antıkalyq saraılar men ortaǵasyrlyq ǵımarattardyń sáýlettik bezendirýinde keńinen qoldanylǵan. Búginde zamanaýı ıntererdiń ajyramas bóligine aınalyp keledi. Sondyqtan keıipkerimiz osy ónerdi zerteı bastaǵan. Ol Reseılik qolóner sheberleriniń jumystarymen tanysyp, beınesabaqtar arqyly tájirıbe jınaqtaǵan.
Qarapaıym qabyrǵadan óner týyndysyna deıin
Barelef — tegis qabyrǵada oryndalatyn kólemdi kompozıtsııa. Sheberdiń aıtýynsha, bul jumys tek bezendirý emes, tapsyrys berýshiniń ıdeıasyn kórkem beınege aınaldyrý úderisi. Nazerkeniń alǵashqy iri jobasy kólemdi gúl kompozıtsııasy bolǵan. Ol jumys 150 myń teńgege baǵalanǵan. Sodan beri sheber ondaǵan jobany júzege asyrdy. Onyń aıtýynsha, barelef jasaý úlken shydamdylyq pen uqyptylyqty talap etedi.
— Ortasha kólemdegi bir qabyrǵany bezendirýge shamamen 7-10 kún ketedi. Keıbir kúrdeli jobalarda birneshe adam bolyp isteımiz. Máselen, úlken kólemdegi gúl kompozıtsııalaryn jasaý kezinde komandalyq eńbek qajet bolady, — deıdi ol.
Sheber ár jumystyń ózindik ereksheligi bolýy tıis dep esepteıdi.
— Ár sýretshiniń óz qoltańbasy bolady. Men jumystarymnyń taza, uqypty ári názik bolǵanyn qalaımyn. Qazir kez kelgen dúnıeniń kóshirmesin jasaý ońaı. Biraq kóshirme týyndylar tez jalyqtyrady. Sondyqtan ár úıge qaıtalanbas dúnıe syılaýǵa tyrysamyn, — deıdi Nazerke.
«Qazaq qyzdary da álemdik deńgeıdegi týyndy jasaı alady»
Sheberdiń pikirinshe, Qazaqstanda qolóner men beıneleý óneriniń qadir-qasıeti áli de tolyq baǵalanyp otyrǵan joq.
— Qolónerdi nemese sýret ónerin kóp jaǵdaıda laıyqty baǵalamaı jatamyz. Keıde óz mamandarymyzdan góri sheteldik sheberlerge kóbirek senetinimiz bar. Biraq bizde talantty jastar óte kóp. Men úshin eń úlken marapat — adamdardyń «qazaq qyzdary da osyndaı dúnıeler jasaı alady eken» degen pikiri, — deıdi Nazerke Qubyǵulqyzy.
Qazirgi ýaqytta ol ınterer dızaıny baǵytyn tereńdetip oqyp, sáýlet salasyndaǵy qyzmetin de damytýǵa nıetti. Al bolashaqtaǵy basty armandarynyń biri — óz qolymen jobalanǵan ári avtorlyq barelefterimen bezendirilgen úlken úı salý.
Sońǵy jyldary áleýmettik jelilerdiń yqpalymen barelef ónerine qyzyǵýshylyq artyp keledi. Buryn sırek kezdesetin bul baǵyt búginde talǵampaz ıntererdiń mańyzdy elementine aınala bastady. Mamandardyń pikirinshe, mundaı jumystar sándik qyzmet atqaryp qana qoımaı, ár úıdiń ózindik bolmysyn aıqyndaıtyn kórkem sheshim retinde de qundy.
Buǵan deıin, Aqtaýlyq krımınalıst qyz — Hanshaıym Bekbolatova týraly jazǵan bolatynbyz.
