Bedeldi menedjerlerdi daıyndaıtyn ınnovatsııalyq baǵdarlama iske aspaq
;ALMATY. Jeltoqsannyń 7-si. QazAqparat / Ádilet Musahaev / - Jańa kezeńdegi bank bıznesiniń bedeldi menedjerlerin daıyndaýǵa arnalǵan ınnovatsııalyq baǵdarlama jaıynda «Eýrazııalyq bank» ókilderi búgin ótken baspasóz máslıhatynda málim etti,
dep habarlaıdy QazAqparat.
Bank basqarma tóraǵasy Maıkl Eggltonnyń aıtýynsha, bank 2010 jyly bes jyldyq oqý baǵdarlamasy boıynsha bakalavrıat pen magıstratýrada joǵary bilim alyp, oqý támamdaǵan 20 qazaqstandyq túlekterge irikteý júrgizedi. Bul baǵdarlama jeńimpazdary bankke orta deńgeıdegi menedjer qyzmetine qabyldanyp, ýaqyt óte joǵary deńgeıdegi top-menedjer qyzmetine deıin ósiriledi.
Atalmysh oqý baǵdarlamasynyń ózektiligi - úzdik túlek Eýrazııalyq bank basqarmasynda korporatıvti jáne bólshekti bankıng front-ofısteri, qarjy, ishki baqylaý men táýekel menedjmenti basqarmalary arasynda jyl saıyn oryn aýystyryp, jumys isteýi. Bul baǵdarlamanyń keıbir satylary banktiń bas ofısi men keıbireýi - Almaty men Astana qalalaryndaǵy fılıaldarynda ótedi.
«Bolashaq 20 qyzmetkerdiń qataryna Almaty joǵary oqý oryndarynyń 10 túlegi, Astana ýnıversıtetteriniń 5 túlegi men shet elde bilim alǵan 5 túlek kiredi», deıdi M. Egglton. Sonymen qatar, ol bıznes mektepterdiń túlekterin izdestirip qana qoımaı, oǵan qosymsha matematıka, ǵylym, ınjınırıng, býhgalterlik esep, qarjy, ekonomıka men marketıng mamandyǵy boıynsha joǵary bilim alǵan jastardy da tartýdyń múmkinshilikterin qarastyratyndyǵyn aıtyp ótti.
Bank ókilderiniń aıtýynsha, baǵdarlama múshesiniń árqaısysy jylyna bir ret jarty kún boıy bank Basqarma tóraǵasymen top-menedjerler qyzmetkerlerimen kezdesip, jumys barysynda týyndaǵan túrli suraqtardy talqylaı alady. Sondaı-aq baǵdarlama aıaqtalǵan soń onyń árbir múshesi bankte belgili bir basqarý qyzmetine taǵaıyndalady.
«Osy baǵdarlama aıaqtalǵanda Eýrazııalyq bank pen qazaqstandyq bank sektorynyń damýyn jańa deńgeıge shyǵaratyn daryndy jas basshylar toby paıda bolady», deıdiEgglton myrza.
