BBC Dastan Satpaevtiń «Chelsıdiń» negizgi quramyna ený múmkindigin baǵalady
ASTANA. KAZINFORM — Qazaqstan quramasynyń shabýylshysy Dastan Satpaev «Chelsıdiń» negizgi quramynda turaqty oınaýǵa eń yqtımal úmitker atandy, dep habarlaıdy Sports.kz.
«2026-2027 jylǵy maýsymda qaı jas oıynshylar ózderin kórsete alady?» degen saýal boıynsha basylym Dastan Sátpaevtyń múmkindigin baǵalady.
— Premer-lıga maýsymy jaqyndap qaldy: 21 tamyz, juma kúni qazirgi chempıon «Arsenal» óz alańynda lıganyń jańadan qosylǵan klýby «Koventrı Sıtıdi» qabyldaıdy. Biz árbir Premer-lıga klýbynan bir-birden maýsymda serpilis jasaýy múmkin 20 perspektıvaly oıynshyny tańdadyq. Bálkim, olardyń arasynan bolashaqta naǵyz juldyzǵa aınalatyn fýtbolshylar tabylar. 17 jastaǵy qazaqstandyq shabýylshy Dastan Sátpaev «Chelsıdiń» negizgi quramyna enýge eń yqtımal úmitker sekildi. Ol jańa bas bapker Habı Alonsodan joǵary baǵa aldy. Sátpaev «Vestern Sıdneı Ýonderers» komandasyna qarsy matchta esep ashyp, qaqpanyń jaqyn buryshyna qýatty soqqymen gol soqty. Ol jyldamdyǵy men kúshin kórsetip, gol soǵýǵa qabiletti ekenin baıqatty. Onyń Chempıondar lıgasynda oınaǵan tájirıbesi bar. Sonymen qatar 2025 jyldan beri ulttyq qurama sapynda 9 match ótkizip, óz elinde úlken juldyzǵa aınaldy, — dep jazdy basylym.
Sátpaevtyń almatylyq «Qaırattan» londondyq «Chelsıge» aýysýy 2025 jylǵy 10 aqpanda resmı túrde kelisilip, jarııalandy. Transfer quny Qazaqstan fýtboly úshin rekordtyq kórsetkish — 4,3 mln eýro boldy. Odan keıin ol «Qaıratta» jalǵa alý sharttarymen oınaýdy jalǵastyrdy.
2026 jylǵy shildede Sátpaev «Chelsıdiń» maýsym aldyndaǵy týryna qatysý úshin komanda ornalasqan jerge bardy. Al klýbtyń tolyqqandy oıynshysy atanýyna 2026 jylǵy 12 tamyzda, ıaǵnı 18 jasqa tolǵan kúninen bastap múmkindik alady.
Aıta keteıik, Sátpaevtyń «Chelsı» sapyndaǵy alǵashqy goly eń úzdik dep tanyldy.
