BBC arnasynda qazaqtar túsken fılm kórsetilip jatyr
ALMATY. QazAqparat - Qazaqstandyq akterler Erden Telemisov, Murat Muqashev pen Nurken Tumataev ózderiniń BBC 1 arnasyndaǵy McMafia fılminde qalaı túsip jatqany týraly aıtyp berdi, dep habarlaıdy QazAqparat.
1 qańtardan bastap sheteldik arnada aǵylshyn-amerıkalyq BBC jáne AMC arnalary birigip túsirgen serıal kórsetilip jatyr.
Kıno brıtan jýrnalısi Mısha Glennıdiń 2008 jyly shyqqan «MakMafııa: Uıymdasqan qylmys» kitabynyń jelisimen túsirilgen.
Qazaqstandyqtar úshin bul premeranyń róli erekshe. Sebebi serıalda mafıozdyń rólin qazaqtar somdap jatyr.
Tımýrdyń rólindegi akter Erden Telemisovtiń aıtýynsha, Qazaqstanda kastıng bolmaǵan. Ótken jyldyń qarashasynda Erdenge belgili skrıpkashy Murat Bısenǵalıev habarlasqan.
Murattyń qyzy Arýhan Ǵalıevaǵa McMafia jobasynyń kastıng dırektory azıat násildi úsh akter taýyp berýin suraǵan.
Prodakshn stýdııadaǵylar Telemisovpen kezdesken soń odan taǵy 2 bandıt taýyp berýin suraǵan.
Osylaısha brıtan serıalyna Murat Muqashev pen Nurken Tumataev túsetin boldy.
«Nurken buryn kınoǵa túsip kórmegen, jarnamalarda ǵana oınaǵan. Murat ekeýmizdiń vıdeolarymyzdy kórip otyryp, olar kadrdaǵy Nurkendi de shaqyrtty. Alǵashynda stsenarııdi aǵylshynsha jiberdi. Keıin oryssha jiberdi», - dedi Erden Telemisov.
Qazaqstandyq akterler somdaǵan keıipkerler serıaldyń birinshi serııasynda boı kórsetedi. Úshinshi serııada olardyń biri ǵana qalady.
«Ulybrıtanııada túsirim protsesi óte joǵary jaýapkershilikpen ótedi. Ózge eldiń akterleriniń daıyndyǵyn kórdik. Máselen, Aleks Goldmandy somdaǵan Djeıms Norton qýǵynnan keıin túsetin stsenalarynda 20 mınýttaı jattyǵý jasady, kózine arnaıy tamshylar tamyzdy. Sonyń arqasynda kadrda shynaıy sharshaǵan adam bolyp kórindi», - dep eske aldy Murat Muqashev.
«Kúntizbelik josparda ár mınýtqa deıin aldyn ala uıymdastyryldy. Túsirilim aldynda akterler aldymen rejısserdiń aldynda, túsirilim tobynyń aldynda oınap kórsetedi. Sosyn áriptesteri kemshilikterin aıtqan soń ǵana motor qosylady», - dedi Erden Telemisov.
Londonda ótken 26 kúnniń 5 kúni ǵana túsirilim jumystaryna arnaldy.
«Jaryqpen jumys jasaý tehnologııalary tań qaldyrdy. Nortonmen tanysý týraly stsena júrip jatqan kezde tek 1 ǵana qural boldy. Qalǵan obektıvterge jaryqty báseńdetetin fıltrlar qoıyldy», - dedi akter.
