BBC arnasy Syr boıynda túsirilim jasady
QYZYLORDA. QazAqparat- Naýryz aıynda Ulybrıtanııadaǵy BBC arnasynyń efırinen tanymal Top Gear baǵdarlamasynyń kezekti shyǵarylymy kórsetildi.
Kólikterge arnalǵan bul baǵdarlamanyń bir bóligi ótken jyldyń sońynda Qyzylorda jerinde túsirilgen edi. 350 mıllıondyq aýdıtorııasy bar Top Gear baǵdarlamasynyń avtorlary, prodıýsserleri men juldyzdy akterlary Syr elinde birneshe kún aýqymdy túsirilim jasady, dep habarlady QazAqparat HAA tilshisi oblystyq ákimdiktiń baspasóz hatshysy Baýrjan Shamshatqa silteme jasap.
Gollıvýdtyq akter Mett Leblan bastaǵan avtoshabandozdar tobynyń qyzyqqa toly oqıǵalaryn baıandaıtyn baǵdarlama arqyly álem jurtshylyǵy ulttyq oıynymyz kókpardy, Baıqońyr ǵarysh aılaǵyn jáne qazaqtyń mádenıeti men salt-dástúrin etene tanı tústi.
«Top Gear jobasynyń túsirilimi BBC arnasynyń qarajaty esebinen júrgizildi, al jergilikti bılik telebaǵdarlamanyń sapaly ári joǵary deńgeıde túsirilýine qoldaý kórsetip, uıymdastyrý sharalaryna atsalysty», - dep atap ótti ákimdikten.
