«Bazz Laıter» Qazaqstan kınoteatrlarynda kórsetilmeıdi - Dáýren Abaev

NUR-SULTAN. QazAqparat - Mádenıet jáne sport mınıstri Dáýren Abaev qyzý talqyǵa túsken «Bazz Laıter» anımatsııalyq fılmi Qazaqstan kınoteatrlarynda kórsetilmeıtinin málim etti. Bul týraly mınıstr áleýmettik jelidegi paraqshasynda jazdy, dep habarlaıdy QazAqparat.

«El azamattary men BAQ ókilderi tarapynan sheteldik «Bazz Laıter» anımatsııalyq fılmine qatysty kóptegen suraq kelip tústi. Jaýabymdy osy post arqyly jetkizýdi jón kórdim. Atalǵan kartına Qazaqstan kınoteatrlarynda kórsetilmeıdi», - deıdi Dáýren Abaev.

Aıta ketsek, «Bazz Laıter» – mýltfılmdegi basty keıipker, ıaǵnı astronavt esimi. Mýltfılm 6 jastan asqan kórermenge arnalǵan.

Kartınanyń qoǵamda qyzý talqylanýyna ondaǵy eki áıel keıipkerdiń bir-birimen súıisýi sebep boldy. Qazaqstandyqtar mýltfılmniń kórsetilýin tyıym salýdy talap etip, qol jınady.

Qazaqstannan bólek, bul mýltfılmniń kórsetilýine 14 elde tyıym salynǵan.