Baj salyǵyn kóteremin: Tramp EO-ǵa eskertý jasady
ASTANA. KAZINFORM – AQSh Prezıdenti Donald Tramp Kanada men Eýropalyq odaq arasyndaǵy áriptestik odan ári keńeıgen jaǵdaıda EO taýarlaryna joǵary baj salyǵyn engizýi nemese Eýropamen saýdany toqtatýy múmkin ekenin málimdedi, dep habarlaıdy DW.
AQSh Prezıdenti bul týraly 16 qyrkúıekte Eýrokomıssııa tóraǵasy Ýrsýla fon der Lıaıenniń Kanadany Eýropalyq odaqtyń alǵashqy «qaýymdastyrylǵan múshesi» etý jónindegi usynysyna qatysty pikir bildirgen kezde aıtty.
– Men muny kúlkili dep sanaımyn. Eger olar osyndaı qadamǵa barsa jáne men ony qandaı da bir deńgeıde dostyqqa jatpaıtyn áreket dep baǵalasam, óte joǵary baj salyǵyn engizemin nemese Eýropamen saýdany toqtatamyn. Eger nıetteri durys bolsa, bári jaqsy. Al nıeti teris bolsa, Eýropaǵa óte joǵary baj salyǵyn engizý – múmkindikterdiń biri, – dedi Donald Tramp.
Buǵan deıin Ýrsýla fon der Lıaıen Eýroparlamentte Kanada Premer-mınıstri Mark Karnıdiń qatysýymen sóılegen sózinde EO men Kanada qarym-qatynasyn «múmkin bolatyn eń joǵary deńgeıge» kóterýdi kózdeıtinin málimdedi. Ol Kanadanyń Eýroodaqtyń alǵashqy «qaýymdastyrylǵan múshesi» bolýyna jol ashý úshin Karnımen birlesip jumys istegisi keletinin aıtty.
Fon der Lıaıenniń aıtýynsha, taraptar ozyq óndiris, tehnologııa, qorǵanys ónerkásibi, Arktıka, energetıka, mańyzdy mıneraldar, akkýmýlıatorlar, jasandy ıntellekt, kvanttyq tehnologııalar, kıberqaýipsizdyq jáne ekonomıkalyq qaýipsizdik salalaryndaǵy yntymaqtastyqty tereńdetýdi josparlap otyr. Ol bul áriptestik basqa memleketterge qarsy baǵyttalmaıtynyn atap ótti.
AQSh pen Kanada arasyndaǵy saýda qatynastary da shıelenisip otyr. 16 qyrkúıekte Tramp Kanada taýarlarynyń AQSh-tyń federaldyq memlekettik satyp alýlaryna qatysýyn shekteýge baǵyttalǵan memorandýmǵa qol qoıdy. Aq úı muny Kanadanyń amerıkalyq kompanııalardyń memlekettik satyp alý naryǵyna qol jetkizýine jańa kedergiler engizýine jaýap retinde túsindirdi.
Sonymen qatar 15 qyrkúıekten bastap Kanadanyń birqatar taýarlaryna qatysty qosymsha 50 paıyzdyq baj salyǵy kúshine endi. AQSh ákimshiliginiń resmı qujattarynda bul sharalar Kanadamen aradaǵy saýda daýyna baılanysty qabyldanǵany kórsetilgen.
