Bazel ınstıtýty Qazaqstanǵa aktıvterdi shetelden qaıtarý protsedýrasyn rásimdeýge kómektesedi

ASTANA. QazAqparat - Bas Prokýrordyń orynbasary Ulan Baıjanov bastaǵan Bas prokýratýranyń delegatsııasy Qazaqstan Respýblıkasynyń Shveıtsarııa Konfederatsııasyndaǵy Elshiliginiń kómegimen Bazel basqarý ınstıtýtymen kelissózder júrgizdi.

Osy Instıtýttyń quramyna kiretin Halyqaralyq aktıvterdi qaıtarý ortalyǵy (ICAR) – ártúrli elderdiń quqyq qorǵaý organdaryna járdemdesetin álemdegi eń iri ortalyqtardyń biri, dep habarlaıdy QazAqparat Bas prokýratýranyń baspasóz qyzmetine silteme jasap.

Kelissózder qorytyndysy boıynsha taraptar Qazaqstan Bas prokýratýrasynyń Bazel basqarý ınstıtýtymen yntymaqtastyq týraly kelisimge qol qoıdy.

Kelisim sharttarǵa sáıkes Bazel ınstıtýtynyń sarapshylary Qazaqstannyń Bas prokýratýrasyna tómende kórsetilgen baǵyttar boıynsha:

1) aktıvterdi qaıtarý máselelerin retteıtin normatıvtik-quqyqtyq aktilerdi taldaý jáne jetildirý jónindegi usynymdar;

2) halyqaralyq tergep-tekserýler júrgizýde jáne aktıvterdi shetelden qaıtarýǵa baılanysty qylmystyq ister boıynsha suraý salýlar daıyndaýda quqyqtyq jáne konsýltatsııalyq kómek;

3) qarjylyq tergep-tekserý jáne aktıvterdi qaıtarý, onyń ishinde álem boıynsha kompanııalardyń benefıtsıarlyq menshik ıeleri men jyljymaıtyn múlik ıeleriniń tizimderinen onlaın rejıminde aqparat alý máseleleri boıynsha oqytý trenıngteri men semınarlaryn ótkizý boıynsha járdem kórsetedi.