«Bazarlyq» ataýymen shetel jazýshylarynyń áńgimelerin toptastyrǵan jańa jınaq jaryq kórdi
ASTANA. Jeltoqsannyń 22-si. QazAqparat /Aıdyn Báımen/ - Almaty qalasyndaǵy «Globýs» baspasynan mektep oqýshylary men jasóspirimder úshin «Bazarlyq» degen ataýmen shetel jazýshylarynyń áńgimelerin toptastyrǵan jańa jınaq jaryq kórdi,
dep habarlaıdy QazAqparat.
Qyzyl muqabasy kórkem bezendirilgen, 25 baspa tabaq kólemindegi bul jınaq QR Mádenıet jáne aqparat mınıstrligi Aqparat jáne muraǵat komıtetiniń arnaıy baǵdarlamasy aıasynda shyǵyp otyr. Kólemdi kitapqa engen sheteldik qalamgerlerdiń úzdik týyndylaryn qazaq tiline jazýshy Qýanyshbaı Qurmanǵalı tárjimalaǵan.
Birinshi bólimde Armenııa, Ázirbaıjan, Belarýs, Lıtva, Moldova, Qyrǵyz Respýblıkasy, Ózbekstan, Reseı, Túrikmenstan, Ýkraına, Estonııa elderiniń ataqshy jazýshylarynyń qysqa da maǵynaly áńgimeleri engen. Shetel qalamgerleriniń balalarǵa arnalǵan ár alýan taqyrypty qamtıtyn kórkemdigi kelisken, sıýjeti qyzyqty, keıipkerleri shynaıy sýrettelgen týyndylary oqyrmanyn birden oı tereńine tartyp áketedi. Bul shyǵarmalardan óskeleń urpaq alar taǵylym men tárbıe mol ekeni anyq.
Ekinshi bólimge orys, sloven halyqtarynyń ertegi-ańyzdary jáne Hans Andersenniń áıgili ertegileri toptastyrylǵan.
Bul jınaqty shyǵarýshylar kitaptyń «Bazarlyq» atalýynyń da úlken máni bar ekenin jazǵan. ıAǵnı, osy kitap shetel jazýshylarynyń qazaq jetkinshekterine jasaǵan rýhanı tartý - bazarlyǵy bolyp eseptelip tur. Kitaptyń taralymy eki myń dana.
