Bazarlardy jańǵyrtýǵa qarjy qaıdan alynady – Saýda komıtetiniń jaýaby

ASTANA. KAZINFORM – Bıyl elimizde 100 bazar jańartylady, ol úshin 5,3 mlrd teńge bólindi. Bazarlardy jańartý jumystary týraly tolyǵyraq Saýda jáne ıntegratsııa mınıstrligi saýda komıtetiniń tóraǵasy Aıdar Ábildabekov aıtyp berdi.

— Bazar ıesi bankten nesıe alady, nesıe alǵan kezde Úkimettiń qoldaýyn alǵym keledi dep nıet bildiresiz. Sol kezde ekinshi deńgeıli bank «Damý» qorymen baılanysyp, sizdiń atyńyzdan usynym beredi, odan ári «Damý» qory qaraıdy, — dedi Aıdar Ábildabekov ortalyq kommýnıkatsııalar qyzmeti alańynda ótken baspasóz máslıhatynda. 

Saýda komıteti basshysynyń aıtýynsha, bıyl bazarlardy jańǵyrtýǵa 5,9 mlrd teńge bólindi. Atalǵan qarjy jalpy saýda sýbektilerin jańǵyrtý, keńeıtý, saýda salasynda IT baǵdarlamalar jasaýǵa jumsalmaq.

— Alaıda, qarajat áli túspedi, naýryzda túsýi kerek, sodan soń qoldaý kórsetiledi bastaıdy, — dep qysqa qaıyrdy spıker.

Sondaı-aq BAQ ókilderi Saýda mınıstrliginiń ókiline bazarlar jańǵyrtylǵan soń, saýda oryndaryn jalǵa alý quny qymbattap, onyń áseri azyq-túlik baǵasynyń ósýine alyp kelmeı me degen saýal qoıdy.

— Jalpy jańǵyrtýdan ótetin barlyq bazarǵa qoldaý kórsetiledi. Saýda oryndaryn jalǵa alý quny bazar ıesine baılanysty, eger ol qarjylaı shyǵynǵa kelip, ony óteımin dese óziniń quzyrynda. Onyń isine biz aralasa almaımyz. Al azyq-túlik baǵasynyń ósýine qatysty naqty aıta almaımyn, ol naryqpen retteledi, — deıdi saýda komıtetiniń tóraǵasy.

Aıta keteıik, bıyl elimizde 100 bazar jańartylady. Aldymen Saýda jáne ıntegratsııa mınıstrliginiń ókilderi barlyq bazardy aralap, tekserip shyǵady. 

Sonymen qatar 2026 jyldan bastap ýaqtyly jańartylmaǵan bazar ıelerine aıyppul salyna bastaıdy. 

Eske sala ketsek, jyl basynda Úkimet basshysy búkil saýda qyzmetin, onyń ishinde bazarlar men úı mańyndaǵy shaǵyn dúkenderdiń qyzmetin tsıfrlandyrý boıynsha naqty usynystar men sharalar ázirleý kerektigin aıtqan edi.