Bazarlardy tekserý: 247 kásipkerdiń tabysyn jasyrý áreketi anyqtaldy
ASTANA. KAZINFORM - Bul týraly QR Saýda jáne ıntegratsııa mınıstri Arman Shaqqalıevtiń tóraǵalyǵymen azyq-túlik bazarlarynda tártip ornatý jáne taýar ótkizý tizbekterindegi tıimsiz deldaldardy qysqartý máselelerine arnalǵan keńes barysynda málim boldy, dep habarlaıdy mınıstrliktiń baspasóz qyzmeti.
Keńes barysynda QR Qarjy mınıstrliginiń málimetteri usynylǵan bolatyn.
Vedomstvo ókilderi 38 iri azyq-túlik bazaryna tekserý júrgizip, olardyń aýmaǵynda qyzmet etetin saýda sýbektileriniń qarjy-sharýashylyq qyzmetine keshendi taldaý jasaǵan.
Júrgizilgen jumystardyń nátıjesinde monıtorıng pen baqylaý sharalary úshin 67 azyq-túlik bazary irikteldi. Bul bazardarda jalpy sany 16 640 saýda sýbektisi qyzmet atqarady.
Taldaý nátıjesinde 4 843 kásipkerdiń baqylaý-kassa mashınalaryn tirkemeı bólshek saýdamen aınalysqany, al 5 846 sýbektiniń tirkelgen POS-termınaldary joq ekeni anyqtaldy. Sonymen qatar tabysyn tómendetip kórsetýge áreket jasaǵan 247 kásipker anyqtalyp, olarǵa qatysty qosymsha taldaý men hronometrajdyq tekserýler taǵaıyndaldy.
Budan bólek, 109 kásipkerge tyńdaýǵa kelý týraly habarlama joldandy. Qazirgi ýaqytta olardyń 74-ine qatysty tyńdaý ótkizilip, nátıjesinde jalpy somasy 3,5 mlrd teńgege qosymsha jıyntyq tabys deklaratsııalary tapsyryldy.
Jumysqa ishki ister organdary da tartylǵan. Olardyń málimetinshe, bazarlar men oǵan irgeles aýmaqtarda zańsyz kóshe saýdasynyń 2 345 faktisi, zańsyz saýdanyń 37 deregi jáne zańsyz kásipkerliktiń 201 jaǵdaıy anyqtalǵan.
Aldaǵy ýaqytta jumys memlekettik organdar men ákimdikter arasyndaǵy jaýapkershilikti naqty bólýdi kózdeıtin biryńǵaı algorıtm negizinde jalǵasady.
Óńirlerge bazarlardy baqylaýdy kúsheıtý, beınebaqylaý júıelerin ornatý jáne tıimsiz deldaldardy anyqtap, olardy osy júıeden shyǵarý jumystaryn jandandyrý tapsyryldy. Sonymen qatar saýda ústemaqylaryna baqylaý kúsheıtilýde.
-Táýekel faktorlaryn eskere otyryp, zańsyz qyzmetten bastap kóleńkeli jumyspen qamtýǵa deıingi, sondaı-aq sanıtarlyq jáne órt qaýipsizdigi talaptarynyń óreskel buzylýy tirkelgen 63 azyq-túlik bazary anyqtaldy. Bul nysandardyń barlyǵy erekshe baqylaýǵa alyndy,-delingen habarlamada.
Osyǵan deıin jyl basynan beri elimizdegi bazarlardan 150 tıimsiz deldal saýda tizbeginen shyǵarylǵany habarlandy.
