Bazarlarda birjolǵy talon negizindegi salyq rejimi joıyldy
ASTANA. 3 qańtar. QazAqparat -2013 jyldyń 1 qańtarynan birjolǵy talon negizindegi salyq rejiminiń kúshi toqtatyldy.
Osylaısha bazarlarda saýda jasaıtyn jáne birjolǵy talon negizindegi arnaýly salyq rejimi sheńberinde bıýdjetpen esep aıyrysatyn tulǵalar 2013 jyldyń 1 qańtarynan bastap salyq tóleýdiń basqa rejimine kóshedi.
Máselen, buǵan deıin de Qarjy mınıstri Bolat Jámishev habarlaǵanyndaı, bazarlarda saýda jasaıtyn barlyq tulǵalar 2013 jyldyń 1 qańtarynan bastap bir mezgilde salyq salý rejimderine kóshýge tıis (patent - tabystyń 2%, ońaılatylǵan deklaratsııa - tabystyń 3%, jalpyǵa birdeı belgilengen tártip - 10% JK úshin, Zańdy tulǵa úshin 20%).
Sonymen qatar, basqa salyq salý rejimderine kóshirý jumystary jalǵasatyn bolady. Atap aıtqanda, 2009 jyldan bastap jeke kásipkerler úshin kameraldyq baqylaý negizinde qyzmetti toqtatýdyń ońaılatylǵan tártibi qoldanylyp keledi (salyqtyq tekserý júrgizilmeı). Jáne salyq eseptiligi nysandary aıtarlyqtaı ońaılatylyp, qysqartylǵan. 2012 jyly 2011 jylmen salystyrǵanda salyq eseptiligi nysandarynyń kólemi qosymshalar bóliginde - 53%-ǵa, paraqtar bóliginde 63%-ǵa, joldar bóliginde 57%-ǵa qysqarǵan.
Eske sala keteıik, salyq tóleýshilerge jańa salyq salý sharttaryna beıimdelýge múmkindik berý, sondaı-aq bazarlarda saýda jasaıtyn tulǵalardyń jańa júıege jeńil aýysýyn qamtamasyz etý maqsatynda, Qarjy mınıstrligi 2012 jyldyń 1 shildesinen bastap bazarlarda saýda jasaıtyn tulǵalarǵa patent nemese ońaılatylǵan deklaratsııa nemese birjolǵy talon negizindegi salyq salý rejimderiniń birin tańdaý quqyǵyn berýdi usynyp keledi.
