Bazarlarda 80-nen astam deldal anyqtaldy – Saýda komıteti

ASTANA. KAZINFORM – QR Saýda jáne ıntegratsııa mınıstrliginiń Saýda komıteti Premer-mınıstrdiń tapsyrmasyna sáıkes bazarlardaǵy ónimsiz deldaldarmen kúres jumystaryn kúsheıtip jatyr.

Komıtet tóraǵasy Ernur Jáýtikbaev Qaraǵandy qalasyna jumys sapary barysynda kóterme jáne ámbebap bazarlardy aralap, bıznes ókilderimen, bazar ıelerimen jáne jergilikti atqarýshy organdarmen kezdesý ótkizdi. Jıynda saýda tizbegindegi jasyryn deldaldyq shemalardy joıý máseleleri talqylandy.

– Óńirlik komıssııalardyń jumysyn kúsheıtý qajet. Memlekettik kirister, ishki ister, monopolııaǵa qarsy organ jáne saýda departamenti saýda tizbegin retke keltirýi tıis. Óńirlerdi aralaý barysynda jeke kásipker retinde tirkelmeı saýda jasap otyrǵandar bar ekenin kórdik. Deldaldyq shemalar ashyq júrip jatyr, soǵan kóz juma qaraýǵa bolmaıdy, – dedi Ernur Jáýtikbaev.

Mınıstrlik málimetinshe, bazarlardaǵy protsesterdi tsıfrlandyrý – deldaldardy joıýdyń negizgi tetigi. Osy maqsatta saýda erejeleri jańartylyp, bazar ákimshilikterine barlyq kelisimsharttar men tólemderdi aqparattyq júıe arqyly júrgizý mindettelgen.

Jyl basynan beri Qaraǵandy oblysynda 41, Ulytaý oblysynda 44 ónimsiz deldal anyqtalyp, saýda tizbeginen shyǵarylǵan. Sonymen qatar óńirlerde komıssııa otyrystary turaqty túrde ótkizilip keledi.

Sapar barysynda komıtet tóraǵasy Qaraǵandydaǵy «Gornıak» bazarynyń jańǵyrtý jumystarymen tanysty. Joba aıasynda 500 mln teńge kóleminde memlekettik qoldaý kórsetilip, 4200 sharshy metrlik jabyq bazar salynýda. Joba iske qosylǵanda 50-80 jańa jumys orny ashylady dep josparlanǵan.

Jalpy óńirde memlekettik qoldaý aıasynda 1,7 mlrd teńgege 9 joba maquldanǵan. Respýblıka boıynsha saýda salasyna bólingen qoldaý kólemi 3,2 mlrd teńgege jetip, 458 joba sýbsıdııalanǵan.

Aıta keteıik, buǵan deıin óńirlerdegi bazarlarda deldaldardyń qyzmetine shekteý qoıylatyny habarlanǵan bolatyn.