«Bazarda júr talaı qazaq balasy...» - respýblıkalyq basylymdarǵa sholý
«Egemen Qazaqstan» gazetiniń búgingi nómirinde «Nursultan Nazarbaev. Ómirbaıan» atty derekti eńbektiń úzindileri basyldy. «Qurysh osylaı shynyqqan» atty materıalda «Nursultan Nazarbaev. Ómirbaıan» atty derekti eńbektiń úzindilerin oqyp, álemdik deńgeıdegi memleket qaıratkeriniń saıası tulǵasymen birge bárin bastan ótkergen, soǵystan keıin aýyldyń qıyndyǵynda ysylǵan, domna peshiniń aptabynda shynyqqan, týǵan elimen astasyp ketken azamattyń ári tanys, ári ystyq beınesin kóre alasyzdar. Eshkimdi beı-jaı qaldyrmaıtyn aqıqat derekter kúreske toly qaısar ómirdiń tarıhqa aınala bastaǵan tolǵaqty sátterin kóz aldyńa jaıyp salady. Oılandyrady, tolǵandyrady, jigerlendiredi.
«Qazaqstan Respýblıkasynyń Tuńǵysh Prezıdenti, Elbasy Nursultan Nazarbaevtyń ómiri men qyzmeti resmı tarıhı-ǵumyrnama janrynda alǵash ret zerttelip otyr. Prezıdent Keńsesiniń bastyǵy, saıası ǵylymdar doktory, kórnekti pýblıtsıst Mahmut Qasymbekov jetekshilik etken shyǵarmashylyq top Elbasytaný salasynda orasan zor ǵylymı jumys atqarypty», - delingen maqalada.
«Keshe tún aýa saǵat 02.45-te Astana halyqaralyq áýejaıyna HHH Jazǵy Olımpıada oıyndarynyń qaharmandary, bylǵary qolǵap sheberleri Serik Sápıev, Ádilbek Nııazymbetov, Ivan Dychko men Marına Volnova, ulttyq quramanyń bas jattyqtyrýshysy Myrzaǵalı Aıtjanov bastaǵan komanda kelip qondy», - dep habarlaıdy «Egemen Qazaqstan» gazeti «12 jyl. 12 tamyz. 12-oryn» atty kelesi maqalasynda.
«Osy jerde quramanyń bas jattyqtyrýshysy M.Aıtjanov boksshylardyń Olımpıadadaǵy jarysy men aldaǵy josparlary týraly oılarymen bólisti. «Biz alǵa qoıǵan maqsatymyzǵa jettik. Bizdiń Olımpıadadaǵy josparymyz úsh medal alý bolatyn. Sol maqsatymyz oryndaldy. Árıne, kemshilikterimizdiń de bolǵany ras. Sebebi, boksshylardyń bári tıisti deńgeıde óner kórsete almady. Bul jarysta bizdiń budan da kóp júlde alýǵa shamamyz kelgen edi. Degenmen, Olımpıada oıyndary bizdiń jas boksshylarymyz úshin úlken mektep, tájirıbe alatyn úlken alań boldy», - dedi ol», - delingen atalmysh materıalda.
«Alash aınasy» basylymy búgingi sanynda «Bazarda júr talaı qazaq balasy...» atty maqala jarııalady. Onda elimizdegi «tentek» bolǵan balalardy tezge salyp, qańǵybas balalardy qaraýyna alatyn mekeme - beıimdeý ortalyqtary týrasynda oı órbitedi.
«Bir ǵana Almaty qalasynda jyl basynan beri kámelettik jasqa jetpegen 808 jasóspirim urlyq-qarlyq, buzaqylyq jasaǵany úshin arnaıy oryndardyń tirkeýine alynsa, 920 búldirshin berekesi ketken otbasylarda tárbıelenýde eken. Sondaı-aq jyl basynan beri toǵyz adam ata-analyq quqyǵynan aıyrylǵan. Bul - bıylǵy jyldyń jartyjyldyǵyndaǵy ǵana kórsetkish», - dep jazady gazet.
Jalpy statıstıka boıynsha, 2011 jyly devıantty minez-qulyqty balalarǵa arnalǵan mekemeniń tizimine ilingen jalpy sany 13,5 myń balanyń 902-si Almaty qalasynan eken. ıAǵnı, bıylǵy jartyjyldyqtaǵy kórsetkish byltyrǵy jyl boıǵy kórsetkishke jeteqabyl. «Sonda beıimdeý ortalyqtaryn quqyq qorǵaý organdary qaramaǵynan alyp, bilim berý uıymdarynyń quramyna berýden ne uttyq?», - dep saýal tastaıdy basylym.
«Aıqyn» basylymy Elbasy atymen atalǵan shyńǵa elimizdiń kók baıraǵy tigilgenin habarlaıdy. «Aldymyzdaǵy senbide Ulttyq qaýipsizdik komıteti Shekara qyzmetiniń qurylǵanyna 20 jyl tolady. Osy tól merekeleri qarsańynda «Boran» manevrlik desanttyq-shabýyldaýshy toptyń shekarashylary Іle Alataýyndaǵy bıiktigi teńiz deńgeıinen 4 376 metr bolatyn Nursultan shyńyna shyǵyp, Qazaqstannyń týyn tikti», - delingen «Nursultan shyńyna tý tigildi» dep atalatyn maqalada.
Elimizde óz jerine saldyr-salaqtyq tanytqan jer paıdalanýshylardyń tizilimi jasalýda. Sonymen qatar jer telimderin ekonomıkada tıimdi paıdalaný maqsatynda, ıgerilmeı jatqan jer ýchaskeleri memleket menshigine alynyp otyratyn bolady. Bul týraly «Kazahstanskaıa pravda» gazeti «Jerge - jaýapkershilikpen jáne uqyptylyqpen qaraıyq» atty maqalasynda. («K zemle - otvetstvenno ı berejno»)
Gazettiń habarlaýynsha, Jer resýrstaryn basqarý agenttiginiń tóraǵasy Qadyrhan Otarov keshe Úkimet aldynda esep berdi. Ústimizdegi jyly 30 mln. gektar aýylsharýashylyq jerine túgendeý júrgiziledi, dedi Q.Otarov. Qazir oǵan daıyndyq jáne dalalyq jumystar aıaqtalypty. Bıylǵa josparlanǵan jer kólemin tekserý jumystary aldaǵy qazanǵa deıin aıaqtalmaq. Negizinen, aýyl sharýashylyǵyna arnalǵan jerdi túgendeý jumystary 2012-2014 jyldarǵa josparlanǵan.
Aýyl sharýashylyǵy qory jerlerin tekserý nátıjesi boıynsha, ústimizdegi jyldyń 7 aıy ishinde 7 mln. gektar jerdiń 3,5 mln. gektary, ıaǵnı, 51 paıyzy aınalymǵa tartylypty. Sonymen qatar, 2012 jylǵy 10 tamyzdaǵy jaǵdaı boıynsha 1 mln. gektar jer memleket menshigine qaıtarylǵan.
