Bazar ıelerine derbes jaýapkershilik júkteledi

NUR-SULTAN. QazAqparat – QR Saýda jáne ıntegratsııalar mınıstri Baqyt Sultanov bazar ıeleriniń jaýapkershiligin kúsheıtý sharalary týraly aıtyp berdi, dep habarlaıdy QazAqparat tilshisi.

Keshe Prezıdent Qasym-Jomart Toqaev Úkimetke Bas prokýratýramen birge bazar ıeleriniń jaýapkershiligin kúsheıtýdi tapsyrǵan edi.

«Ózderińiz biletindeı, Memleket basshysynyń tapsyrmasy boıynsha Bas prokýratýra bıylǵy mamyr aıynda 122 bazardy tekserýdi aıaqtady. Tekserý qorytyndysy boıynsha birqatar júıeli problemalar anyqtaldy», - dedi mınıstr Úkimet úıinde ótken baspasóz máslıhatynda.

B. Sultanov Bas prokýratýramen, múddeli memlekettik jáne jergilikti atqarýshy organdarmen birlesip birqatar zańnamalyq túzetýler ázirlengenin aıtty.

«Olar myna baǵyttar boıynsha bazarlardyń qyzmetin odan ári jańǵyrtý sharalaryn kózdeıdi: bazardyń menshik ıesine saýdany uıymdastyrý úshin derbes jaýapkershilikti bekitý; bazarlarǵa qoıylatyn biliktilik jáne ınfraqurylymdyq talaptardy belgileý; otandyq taýar óndirýshilerdiń saýda alańdaryna básekeli jáne erkin qol jetkizýin qamtamasyz etýge múmkindik beretin aqparattyq júıeni qurý. Bul normalar «Qazaqstan Respýblıkasynyń keıbir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly» Zań jobasyna engizilgen», - dedi Baqyt Sultanov.

Búgingi tańda bul zań jobasy Parlament Májilisiniń qaraýynda. Onyń kúzgi sessııa barysynda qabyldanýyn kútemiz.

Buǵan deıin Saýda mınıstri «Ulttyq taýar ótkizý júıesin iske qosýdyń ne sebepti keshiktirilgenin túsindirgen edi.