Bazalyq mólsherlemeniń ósýine baılanysty teńge depozıtteri halyq úshin tıimdi bolady - sarapshy
NUR-SULTAN. QazAqparat - Qarjy sarapshysy Rasýl Rysmambetov bazalyq mólsherlemeniń 12%-ǵa deıin ósýine jáne odan keıingi depozıtter boıynsha mólsherlemelerdiń ósýine túsinikteme berdi, dep habarlaıdy QazAqparat.
Onyń pikirinshe, Ulttyq banktiń áreketi teris syrtqy faktorlardy eskergende durys boldy.
«Bul – óte qajet. Bazalyq stavkanyń artýy qandaı da bir alypsatarlyqty tejeý úshin reaktıvti shara boldy. Ulttyq bank kýrsty ustap turý quraldary bar ekenin kórsetip jatyr. Oǵan qosa, bazalyq mólsherleme - bul tek nesıe ǵana emes, bazalyq mólsherleme depozıtterge qatysty. Bankterdiń reaktsııasyn kórýdiń ózi qýanyshty. Qazaqstan depozıtterge kepildik berý qory eń joǵary usynylatyn syıaqy mólsherlemesin qaıta qaraǵannan keıin, úsh bank eń joǵarǵy mánge deıin teńgedegi depozıtter mólsherlemesin tez arada kóterdi», - dep habarlady ol.
Sarapshynyń pikirinshe, depozıtter boıynsha mólsherlemeni klıentter úshin barynsha tıimdi jaǵdaı jasaý úshin ekinshi deńgeıdegi basqa bankter de birtindep arttyra alady.
«Mólsherlemeni arttyrý teńgedegi depozıtter sany men tabysyn saqtap qalady. Shetel valıýtasyndaǵy depozıtter boıynsha mólsherleme áldeqaıda tómen», - dedi sarapshy.
Búgin Eýrazııa banki jáne Hoým Kredıt banki merzimdi emes depozıtter («Turbo Deposit» jáne «Jaı depozıt») boıynsha mólsherlemeni 9,8%-dan 12,5%-ǵa deıin kóterdi. TsentrKredıt banki «Chempıon» merzimdi emes depozıti boıynsha mólsherlemeni 9,8%-dan 12,5%-ǵa deıin jáne «Rahmet» jınaq depozıti boıynsha 3 aıǵa 12,5%-dan 13%- ǵa deıin joǵarylatty.
10 naýryzda Ulttyq bank syrtqy sektor tarapynan táýekelderdiń teris áseri aıasynda baǵalardyń turaqtylyǵyn qoldaý qajettiligine negizdelgen bazalyq mólsherleme deńgeıi boıynsha kezekten tys sheshim qabyldady. 2020 jyldyń 10 naýryzynan bastap bazalyq mólsherlemeni jyldyq 12% deńgeıinde belgilendi, paıyzdyq dáliz +/- 1,5 p. p. deıin keńeıtildi.
