Bazalyq mólsherlemeni tómendetý máselesi múlde talqylanǵan joq – Ǵalymjan Pirmatov

ASTANA. QazAqparat – Ulttyq banktiń basqarma tóraǵasy Ǵalymjan Pirmatov bazalyq mólsherlemeni belgileýge arnalǵan komıtet jıynynda atalǵan shamany tómendetý máselesi múlde qaralmaǵanyn atap ótti, dep habarlaıdy QazAqparat tilshisi.

«Ulttyq bank komıtetiniń búgingi jıynynda bazalyq mólsherlemeni tómendetý nemese qazirgi kúıinde qaldyrý máselesi talqylandy ma? Bazalyq mólsherleme boıynsha basqa qandaı nusqalar usynyldy?», - dep surady BAQ brıfıngide.

Ǵalymjan Pirmatov talqylaý kezinde bazalyq mólsherlemeni qazirgiden neshe pýnktige kóterý kerek degen suraq qana qaralǵanyn túsindirdi.

«Búgingi talqylaý kezinde bazalyq mólsherlemeni tómendetý máselesi múlde talqylanǵan joq. Mólsherlemeni qazirgi deńgeıinde, ıaǵnı, 16% kúıinde qaldyrý nusqasy da talqylanǵan joq. Komıtettiń músheleriniń bári mólsherlemeni kóterý kerektigin aıtty. Negizgi áńgime neshe paıyz mólsherinde kóterý kerektigi aınalasynda órbidi. Búkil derekterdi eskerip, boljamdaý kezeńiniń qorytyndylaryn eskerip, komıtet 16,75% mólsheri durys bolady degen sheshim qabyldandy», - dedi Ulttyq bank basshysy.

Eske salsaq, búgin Ulttyq bank bazalyq mólsherlemeniń deńgeıin 16,75% dep belgilegen bolatyn.