Bazalyq mólsherleme túsýi múmkin be

ASTANA. QazAqparat – Úkimet basshysy Álıhan Smaıylov Saýda jáne ıntergratsııa mınıstrliginiń keńeıtilgen alqa májilisinde bazalyq mólsherlemeni túsirý múmkindigi týraly pikir bildirdi, dep habarlaıdy QazAqparat tilshisi.

«Bazalyq mólsherleme boıynsha aıtsaq, byltyr baǵanyń ósýine bazalyq mólsherlemeniń eshqandaı qatysy bolǵan joq. Biz bazalyq mólsherlemeni kótergenin durys dep esepteımiz. Óıtkeni ınflıatsııalyq boljam degen uǵym bar. Ol boljamdar keıbir obektıvti faktorlardan bólek úlken ınflıatsııalyq protsesterdi týyndatady. Naryqtaǵy oıynshylar ınflıatsııa bolsa, bazalyq mólsherleme ósýi kerektigin túsinedi. Al mundaı jaǵdaıda bazalyq mólsherleme óspese, ınflıatsııa odan ári órshıdi. Bul ınflıatsııalyq boljamdarmen tyǵyz baılanysty. Sondyqtan bazalyq mólsherlemeniń kezekti ret ósýi durys boldy dep oılaımyn», - dedi Úkimet basshysy.

Sondaı-aq ol byltyr naýryz aıynda bazalyq mólsherlemeniń óskenin eske saldy. Sonyń ınflıatsııaǵa tıgizetin áseri bıyl naýryzda kórinis tabý kerek.

«Byltyr naýryzda biz bazalyq mólsherlemeniń óskenin kórdik. Bıyl osy kezeńde bastap bıznestiń nesıe alýy úshin bazalyq mólsherlemeni tómendetý qajet bolady», - dedi Premer-Mınıstr.

Eske salsaq, ótken jyldyń sońynda Ulttyq bank bazalyq mólsherlemeniń deńgeıin kóterip 16,75% dep belgilegen bolatyn.