Bazalyq mólsherlemeniń tómendeýi teńge baǵamyna áser etpeıdi – Ulttyq bank
ASTANA. KAZINFORM – Qazaqstan Ulttyq bankiniń tóraǵasy Tımýr Súleımenov bazalyq mólsherlemeniń 17%-ǵa deıin tómendeýi teńge baǵamynyń álsireýine ákelmeıtinin málimdedi.
Onyń aıtýynsha, bazalyq mólsherlemeniń tómendeýi teńgelik aktıvterge degen suranysqa áser etpeýi tıis. Sondyqtan halyq pen ınvestorlardyń teńgege degen qyzyǵýshylyǵy saqtalady.
– Teńgelik depozıtter, korporatıvtik oblıgatsııalar, memlekettik jáne kvazımemlekettik baǵaly qaǵazdar burynǵydaı tıimdi bolyp qala beredi. Sonyń nátıjesinde teńgelik aktıvterge suranys tómendemeıdi, al teńge baǵamy aıtarlyqtaı ózgermeıdi, - dedi ol.
Sonymen qatar, Ulttyq bank basshysy jazǵy maýsymda shetel valıýtasyna suranys dástúrli túrde artatynyn atap ótti. Buǵan memlekettik satyp alýlardyń jandanýy men azamattardyń demalys kezeńinde shetelge jıi shyǵýy áser etedi.
– Jyldyń basynda shetel valıýtasyna suranys ádette tómen bolady. Sebebi bıýdjet qarajatynyń ıgerilýi men memlekettik satyp alý rásimderiniń aıaqtalýyna belgili bir ýaqyt qajet. Al jazǵa qaraı tender jeńimpazdary anyqtalyp, kásiporyndar dollar satyp alý úshin naryqqa shyǵa bastaıdy. Bul – jyl saıyn qaıtalanatyn qalypty maýsymdyq qubylys, - dedi Ulttyq bank tóraǵasy.
Osy tusta Tımýr Súleımenov ulttyq valıýtanyń turaqtylyǵyna negiz bolatyn faktorlar saqtalyp otyrǵanyn da aıtty.
– Jyl basynda munaıdyń bir barreli 65-67 dollar shamasynda bolsa, qazir onyń baǵasy 100 dollarǵa jýyqtady. Metall baǵalary da ósti. Bul eksporttan túsetin valıýtalyq túsimniń artýyna múmkindik beredi. Sondyqtan syrtqy naryqtarda kútpegen ózgerister bolmasa, teńge baǵamynyń álsireýine negiz joq, - dedi ol.
Eske salaıyq, 5 maýsymda Qazaqstan Ulttyq banki bazalyq mólsherlemeni 18 paıyzdan 17 paıyzǵa deıin tómendetý týraly sheshim qabyldady. Buǵan deıin mólsherleme alty aıdan astam ýaqyt boıy 18 paıyz deńgeıinde saqtalǵan edi.
