Bazalyq mólsherlemeniń tómendeýi kredıt pen ıpotekaǵa qalaı áser etedi

ASTANA. KAZINFORM – Bazalyq mólsherlemeniń tómendeýi halyqtyń nesıe nemese ıpotekaǵa turǵyn úı alýyna qalaı áser etedi? Bul suraqqa Ulttyq banktiń tóraǵasy Tımýr Súleımenov jaýap berdi.

«Kezekti bazalyq stavka tómendedi. Ekinshi deńgeıdegi bankter osy mólsherlemege súıene otyryp, bıznes nesıesi, ıpoteka, tutynýshylyq nesıeler jáne kredıt túrlerin anyqtaıdy. Sondyqtan bazalyq mólsherlemeniń tómendeýi, nesıe ónimderiniń qunynyń tómendeýine ákelýi tıis», — dedi Tımýr Súleımenov bankte ótken baspasóz máslıhatynda.

Ulttyq bank tóraǵasynyń málimdeýinshe, syrtqy ınflıatsııalyq orta jaqsarýda. Bul álemdik azyq-túlik naryqtaryndaǵy baǵalardyń odan ári tómendeýine jáne ortalyq bankterdiń tejeýshi saıasatyna baılanysty.

«Biraq ınflıatsııany ósirýi múmkin keıbir faktorlar men táýekelder saqtalyp otyr. Táýekelder ornyqty tutynýshylyq suranysqa, fıskaldyq yntalandyrýǵa, joǵary ınflıatsııalyq kútýlerge jáne retteletin baǵalardaǵy reformalardyń aıaqtalmaýyna baılanysty. Sonymen qatar syrtqy ortada Reseıdegi ınflıatsııanyń jedeldeýine baılanysty táýekelder baıqalýda», — deıdi ol.

Sondaı-aq, T.Súleımenov ınflıatsııanyń ornyqty túrde tómendeýin qamtamasyz etip, ortamerzimdi keleshekte ınflıatsııany 5%-ke jýyq shamada turaqtandyrý qajet ekenin aıtty.

Buǵan deıin habarlaǵanymyzdaı, Ulttyq bank ınflıatsııany 15,25% deıin tómendetý týraly sheshim qabyldady.