Bazalyq mólsherlemeni odan ári tómendetýge ne kedergi bolýy múmkin
ASTANA. KAZINFORM – Ulttyq bank bazalyq mólsherlemeni odan ári tómendetý múmkindigi shekteýli ekenin málimdedi. Bul týraly Ulttyq bank tóraǵasy Tımýr Súleımenov aıtty.
Onyń sózinshe, qazir mólsherlemeni tómendetýge ınflıatsııanyń turaqty baıaýlaýy múmkindik berip otyr. Tamyzda jyldyq ınflıatsııa 9,8%-ǵa deıin tústi.
– Biz aqsha-kredıt saıasatyn jumsartqan joqpyz. Inflıatsııanyń baıaýlaýyna baılanysty bazalyq mólsherlemeni soǵan saı tómendettik. Jalpy saıasatymyz burynǵydaı birqalypty qatań kúıinde qalyp otyr, – dedi ol.
Alaıda jyl sońyna deıin mólsherlemeni taǵy tómendetýge múmkindik bola ma, ázirge belgisiz. Ulttyq banktiń qazirgi boljamynsha, mundaı múmkindik shekteýli. Sebebi ekonomıkada ınflıatsııany kúsheıtýi múmkin faktorlar saqtalyp otyr.
Sonyń biri – Ulttyq qordan bólinetin qosymsha transfertter.
– Qosymsha transfertterdiń ekonomıkaǵa qalaı áser etetini olardyń naqty qalaı ıgeriletinine baılanysty. Óıtkeni qarajatty bıýdjetke josparlaý bir bólek, onyń naqty jumsalyp, ekonomıkaǵa qanshalyqty áser etetini bir bólek, - dedi Ulttyq bank tóraǵasy.
Taǵy bir faktor – munaı jáne munaı ónimderi naryǵyndaǵy jaǵdaı. Ulttyq bank bul naryqtaǵy ózgeristerdi Úkimetpen birge baqylap otyr.
– Qazirgi boljamymyzǵa súıensek, bazalyq mólsherlemeni odan ári tómendetý múmkindigi shekteýli dep otyrmyz, – dedi Tımýr Súleımenov.
Aıta keteıik, buǵan deıin Ulttyq bank bazalyq mólsherlemeni 16,25%-ǵa deıin tómendetkeni habarlandy.
